Ka phutbol ka dei kawei na ki jingïalehkai kaba ka rung jylliew ha ki thied snam jong ka Meghalaya. Ha ki snem kiba la leit noh, kane ka Jylla kaba ieit ïa ka phutbol ka la pynmih ïa ki nongïalehkai shynrang bad kynthei kiba la shah jied ban mihkhmat ïa ka Ri India ha ki kyrdan bapher-bapher naduh ki kyrdan junior haduh senior. Ka Jylla Meghalaya ka la kylla long ka jaka jong ki nongïalehkai phutbol kiba don sap, bad kaba la ai mynsiem bad pynshlur ba kin lah mynta ban phohsniew ban ïoh phong ïa ka jersey jong ka Ri India.
La sakhi ba dang ha kine ki khyndiat taïew, ar ngut na ki heprit ba paw jong ka Meghalaya, kata u Mekhamkhraw Nongrem bad Donald Marthong ki la lah ban ïarap ïa ka Minerva Academy ba kan ïoh rah ïa ka nam lahduh ha ka U-12 Gothia Cup (World Youth Cup) kaba la long ha Sweden. Lah ruh ban kynmaw ba u heprit Samborlang Rynjah ïa uba la sin kum u Martinez Jr ruh u la ïadon bynta bad ka Minerva Academy. Ym tang kine ki heprit, hynrei ha ki snem kiba la leit ruh ki la don bun ki rangïalehkai ba tbit ka Jylla kiba ïalehkai na ki klob bapher-bapher hapoh Meghalaya, kiba la leit ban pynïasoh bad ka Minerva.
Ka jingmih jong ki khlur ïalehkai ka la sdang na ki klob bad ki lympung bapher-bapher ba ju pynlong ha Jylla kiba la sei bad pynmih ïa ki samla kiba don sap. Ka Jylla Meghalaya ka la lah ban sei ïa kiba bun ki rangïalehkai ba kin mihkhmat ym tang ïa ka Meghalaya hynrei wat ïa ka Ri India, kum jong u Samla Aiborlang Khongjee, Eugene Lyngdoh, Rokus Lamare, Halen Nongtdu, Manbhakupar Malngiang, Balamkupar Rynjah nalor kiwei-kiwei kiba la wanrah ka burom ïa ka Jylla.
Sa shisien pat, kane ka jingjop ka pyni ba ki khynnah bad ki samla jong ngi, kim dei shuh kiba dang duna ha ka jingïalehkai phutbol lada ki ïoh ïa ki nonghikai bad ka rukom shah hikai kaba biang nalor kiwei pat ki jingdonkam kiba manla ka sngi. Wat na ka liang jong u Ranjit Bajaj uba dei u trai bad nongseng ïa ka Minerva Academy u la dep ban ai ka jingïaroh kaba khraw ïa ki nongïalehkai phutbol ka Meghalaya, ha kaba u la ong ba watla ki long kiba rit briew bad duna ka rynïeng hynrei ki long pat kiba satar bad kiba aiti lut ïalade ha madan ïalehkai.
La ju sakhi ba na ka liang jong ka Sorkar Jylla ruh ka la phai khmat bha ïa ka kam ïalehkai phutbol hynrei tang kata kam pat biang bad kam dei ban kut tang hangta. Kaei kaba ki donkam ka long ban shah hikai pyntbit shuh-shuh khnang ba kum ki nongïalehkai kin don ka jingnang jingtip bad jingshemphang kumno ban pynjanai ïalade ha kane ka jingïalehkai. Hynrei lada ym don eiei ban kyrshan ïa ki, ki khynnah lehse kin duh jingkyrmen bad ki lah ban leit wad noh da kiwei ki kam ki jam ban kamai jakpoh. Namarkata, ka Sorkar bad kiwei pat ki kynhun ka dei ban shimkhia ban peit ba ym tang kitei ki khynnah hynrei kumjuh ruh ïa kiwei kiba don ka sap kaba tbit ban plie lad ban pynïoh ïa ka jinghikai pyntbit kaba kham bha.
Ngim dei ban kheiñ dewthala ïa ki khynnah kiba don jingtbit ha ki kam ïalehkai namar jan baroh ki jingïalehkai ha kane ka juk ki dei kiba wanrah ja wanrah doh ïa ki nongïalehkai bad ki ïing ki sem jong ki. Ngi ju ïohi ba ki Sorkar bad kiwei ki ju ai da ka pisa kaba heh sha ki nongjop ha ka lympung Olympics bad kiwei. Ngim lah ban len ba ha kine ki khyndiat snem, ka Sorkar ka la pynleit jingmut ban thaw ïa ki madan ïalehkai phutbol ba la siang da u phlang plastik khnang ban ailad ïa ki nongïalehkai ban ïashim bynta ha ki jingïakhun. Nalor jong ki madan ïalehkai phutbol, donkam ruh ban pynleit jingmut sa sha kiwei pat ki jingïalehkai kiba ki khynnah bad ki samla jong ngi ki don ïa ka sap ka phong ba kin paw. Nalorkata, hap ruh ban ïoh da ki nonghikai kiba tbit khnang ba ki khynnah bad samla kin ïoh jingmyntoi kham bun ban ïa kaba ki ïoh mynta. Ngi dang donkam bun kiei-kiei ban pynlong ïa ka Meghalaya kum ka Jylla kaba khlaiñ ha ki kam ïalehkai.
