Shillong, Nailar 04
Ha ka 06 tarik u Nailar (August) 2026, ka Hynñiewtrep Integrated Territorial Organization (HITO), kan mih paidbah ban pynpaw ïa ka jingpyrshah bad ban dawa na ka Sorkar, ba kan shimkhia halor ki mat kiba la slem bha, kiba dang sahkut bad ki jingbymhok ha ka jingpyntreikam ïa ki aiñ.
Ki mat ba ka HITO kan dawa ki long, ka jingbym shimkhia halor ka Resolution Dewïong, kaba la mynjur da ka Ïingdorbar Thawaiñ ka Jylla, ha ka 24 tarik u Nailur (September) 2015, hynrei haduh mynta ym pat ïohi ïa kano-kano ka jingpyntreikam kaba shai.
Ka jingbym shim kam pyrshah lane weng ïa ki ophisar lane ki briew kiba donkti ha ka jingailad ïa ki kam be-aiñ jong ki mafia dewbilat bad Shree Cement, wat hapdeng ki jingkynnoh kiba jur.
Ka jingailad ïa ki nongshong shnong nabar jylla ban ïoh kontrak bad ki kam Sorkar, khlem da burom ïa ka hok jong ki trai jylla bad ki nong Meghalaya, kiba dei hok ban ïoh bynta nyngkong. Ka jingbym shna shuh ïa ki Hostel Sorkar na ka bynta ki samla pule, kiba wan na ki thaiñ nongkyndong bad kiba duna ka ïoh ka kot, kaba ktah jur ïa ka pule puthi jong ki.
Nalorkata, ka jingdawa halor ka jingbym ïaryngkat ka jingpyntreikam ïa ka aiñ. Ïa ki trai ri la ju weng shnong khlem jingtip bad khlem jingïasyllok, hynrei haba dei pat ki hehspah mynder, wat hadien ba la ai jingthoh ruh ym lah ban pyntreikam ïa ka aiñ.
Ka jingdawa ba ka Sorkar kan pyntreikam ïa ka aiñ khlem jingïashah liang, kan burom ïa ka hok jong ki trai ri, bad kan shim ïa ki sienjam kiba shai bad kiba don jingkitkhlieh halor kine ki mat, kiba ktah ïa ka bha ka miat bad ka lawei jong ka Jylla.
Ka HITO ka pynbna ruh, ba kan ai ka jingkyrshan ïa kane ka jingmih paidbah ba la pynlong da ka Voice of the People Party (VPP), namar ba ki mat kiba la rah shakhmat kim dei ki mat saiñ pyrthei jong kano-kano ka party, hynrei kidei ki mat paidbah kiba ktah ïa ka bha ka miat bad ka lawei jong ka Jylla bad ka jaidbynriew Hynñiewtrep.
Ka HITO ka ngeit skhem ba haba ki mat kidei na ka bynta ka ri bad ka hok jong ki trai jylla, kadei ka kamram jong baroh ki kynhun paidbah bad ki nongshong shnong ban ïatylli, khlem da peit ïa ka jingïapher ha ka saiñ pyrthei.
Kumta ka HITO, ka khot bad wer ïa baroh ki dkhot, ki nongkyrshan bad ki paidbah ba kin wan ban ïasnohkti lang ha kane ka jingmih paidbah ha ka 6 tarik u Nailar (August) 2026, ban pyni ïa ka jingïatylli bad ban dawa ïa ka jingpyntreikam hok ïa ki mat kiba ktah ïa ka ri bad ka jaidbynriew.
“Da ka jingïatylli ngin ïeng skhem. Da ka jingïaishah ngin ïada ïa ka hok jong ki trai ri,” la pynkut ka HITO.
