Shillong, Nailar 05
U Symbud Myntri Rangbah ka Jylla uba dei ruh u Chairman ka West Jaiñtia Hills Regional Committee, Bah Sniawbhalang Dhar ha ka Sngi Balang u la ong ba ka Meghalaya ka la pynkhreh na ka bynta ka jingïakren halor u pud u sam ha ka kylla ban wan, hynrei ka dang ap ïa ka Assam ban thung ïa u Chairman jong ka komiti jong ka.
“Ngi dang ap ïa ka Assam ba kan pyntip sha ngi mano ban long u Chairman na ka liang jong ki. Tang mar ïa thung ïa u Chairman jong ka Regional Committee, nga tharai ngin sa ïakynduh,” la ong u Bah Dhar.
Halor ka jinglong-jingman jong ki kaiphod na ka bynta ki shnong kiba hap hapoh ka Block-I, u Bah Dhar u la ong ba baroh ar tylli ki Jylla ki dang don hapdeng ka jingpynïaid kam ban pynbeit ïa kiei-kiei baroh hashuwa ban aiti ïa ki kaiphod.
“Ngi la pynkhreh. Hap ban aiti ïa ki kaiphod na baroh ar tylli ki Jylla. Ngan ym ong ba ka long kaba eh, hynrei namarba ki jaka ba don hapdeng ka jingïakajia ki long beit ki bynta jong ka jingïakren, ngin sa peit ïa kata,” u la ong.
U la kdew ba ïa kane ka mat la buh hakhmat ki komiti ba ïatreilang ba la thaw da ki ar tylli ki Sorkar.
“Ngi la phah ïa kane ka sobjek sha ki komiti jong baroh ar tylli ki Sorkar Jylla. Dei na kata ka daw ba ka komiti ka dei ka bor ban shim rai halor ki kam khappud,” la ong u Bah Dhar. Haba kylli halor ka jingdawa ban pynphai biang ïa ka Block-I sha Meghalaya, u Symbud Myntri Rangbah u la ong ba ka Jylla ka la jan dep ïa ka jingwad bniah jong ka halor kane.
“Ngi la leh ïa ka jingwad bniah kaba donkam na ka liang jong ngi. Ki ophisar ki la jan dep. Ynda la dep lut ïa baroh ki kaiphod, ngin sa shong jingïalang shuwa, bad hadien kata, ngin sa pyntip sha ka Assam. Ynda ki la thaw ïa ka komiti jong ki, baroh ar tylli ki komiti kin sa shong jingïalang bad shim ïa ka rai,” u la ong.
Halor ki jingkylli ba ïadei bad ki shnong ba bun ki paid ki Khasi-Pnar ha katei ka jaka ba don hapdeng ka jingïakajia, u Bah Dhar u la ong ba ki jingtip ki don bad ki bor distrik. “Kane ka don bad u DC ha kaba ïadei bad ka jaka ba don hapdeng ka jingïakajia,” u la ong.
