Shillong, Nailar 05
U Chief Engineer ka Public Health Engineering (PHE) Meghalaya u Bah Robert Sing Nongbri u la pynshai ba ka jingslem ka tnad ban siew ïa ka tulop jong ki nongtrei Muster Roll ka dei namar ba ka tnad ka hap ban bud ryntih ïa ki kyndon ba la bthah da ka Sorkar.
Haba kren sha ki nongthoh khubor ha ka sngi Balang u Bah Nongbri u la ïathuh ba ha ka jingwan kynduh ki nongïalam ka Joint Action Committee jong ki nongtrei Muster Roll, ka ophis ka la ïaleh ban pynsngewthuh ba ka jingpyllait ïa ka tulop jong ki kan dang shim por sa kumba ar ne lai sngi ban pyllait lut ïa ka tulop jong ki nongtrei.
U la ïathuh ba ka tnad ka dang sdang ban leh da ka rukom siew ba thymmai lane e-Payment, ïa kaba tnad ka hap ban pynrung kyrteng ïa baroh ki nongtrei sha ka ‘System’ bad kane ka la kham shimpor khyndiat ban pyndep ïa ki jingdonkam. “Kumba ka long mynta ka tnad ka dang lah ban pynkhuid ïa ka jingsiew tang ïa ka Baghmara Division katba kiwei ki dang don hapdeng ka jingïaid ka kam” u la ong.
U Bah Nongbri u la ong ba na ka liang jong ka Sorkar ka kwah ba ka jingsiew tulop ïa ki nongtrei ka dei ban long thikna man la u bnai, ka tnad ruh ka ïaleh ban bud ïa ki kyndon jingbthah jong ka Sorkar bad u la pynpaw ba na ka liang ka tnad nangne shakhmat kan pynthikna ba kan ym don kano-kano ka jingdkoh ha ka ban siew ïa ka tulop jong ki nongtrei.
Haba ïadei ka jingbyrngem ki Muster Roll ban pynsangeh ïa ka jingsam um, ka ban ktah ïa ki lak ngut ki paidbah ba lui-lui ha kylleng ka Jylla, ki bym don bynta eiei ruh em bad kane, u Bah Nongbri u la kyntu ïa ki nongtrei Muster Roll ba kin ïaishah sa shisngi arsngi ba ka tnad kan lah ban siew khuid noh ïa ka tulop jong ki bad haba ïadei kiwei ki jingsiew ba ki Muster Roll ki dei ban ïoh ruh ka tnad kan ïaleh ban pynïaid beit ïaid ryntih nangne shakhmat.
