Jowai, Nailar 05
U Deputy Commissioner ka West Jaiñtia Hills u la pynmih ïa ka hukum kaba bthah ïa baroh ki nongdie dukan wholesale bad retail kiba don ha ki ïew hapoh ka District ba ki dei ban bud ryntih ïa ki jingbthah ba la pynmih da ka Directorate of Food Civil Supplies & Consumer Affairs, ka Sorkar Meghalaya, kaba treikam mardor.
Baroh ki nongkhaïi kumjuh ki nongdie dukan ki dei ban pyni shai bha ïa ki dor ba la don lypa jong baroh ki mar ba kongsan ha la ki jong ki jong ki dukan, ha ka rukom kaba shai bad kaba lah ban pule na ka bynta ka jingtip jong ki nongthied.
Ka hukum ka khang pyrshah ïa ka jingdie ‘black’ ne beaiñ, ban buhrieh ïa ki mar da ka thong ban pynkiew dor ïa ki mar ba kongsan palat ïa ka dor ba la pynbna ne ba la mynjur da ka Sorkar.
La maham shuh shuh ba yn pynshitom pyrshah ïa kino kino ki nongkhaïi kiba lap ba ki die ïa ki marbam kiba la sniew bad ki bym ïahap bad ki kyndon ba la buh katkum ka Food Safety and Standards Act, 2006 bad kiwei kiwei ki kyndon kiba treikam.
Ki nongkhaïi ki dei ban ïatreilang bad ki kynhun jurip ba la thaw da ka bor synshar District bad ka tnad Food Civil Supplies & Consumer Affairs da kaba buh ïa ki jingthoh kiba biang, naduh ki mar ne stock, ki kot ki sla ba pyni ïa ka jingthied bad ban pynmih ïa ki ha kano-kano ka por ba donkam.
Ka hukum ka bthah shuh-shuh ïa ki nongkhaïi ban kohnguh ïa baroh ki jingbthah ba la pynmih na ka por sha ka por hapoh ka Price Monitoring System na ka bynta ki mar ba kongsan.
Uno uno u nongkhaïi uba la lap ba u pynkheiñ ïa ka jingbthah ba la kdew haneng lane u khlem kohnguh ïa ki kyndon jong ka Essential Commodities Act, 1955 bad kiwei-kiwei ki aiñ bad ki kyndon kiba treikam un shah pynngat ha ka jingpynshitom, kynthup ïa ka jingkurup ïa ki mar, ka jingpyndam ïa ka laisen khaïi bad ka jingshah pynngat katkum ka aiñ.
La kyrpad ïa baroh ki Market Committee, ki dorbar shnong bad ki Trade Association ban pynphriang ïa ka jingpynbna hapdeng ki dkhot jong ki bad pynthikna ïa ka jingbud ryntih kaba pyrkhing.
