Shillong, Nailar 05
Kum ka lad ban khang ïa ka jingbret jaboh bad ban kyntiew ïa ka kam jngohkai kaba don ka jingkitkhlieh, ki bor pynïaid district jong ka East Khasi Hills ki la pynmih ïa ka hukum ban mana ban shet jingshet ha ki rud surok bad ban bret jaboh ha ki jaka jngohkai pyrthei, ki jaka peit kai bad ki jaka paidbah ha baroh kawei ka district.
U District Magistrate ka East Khasi Hills u Abhilash Baranwal u la pynmih ïa ka hukum katkum ka kyndon 163 jong ka Bharatiya Nagarik Suraksha Sanhite (BNSS), 2023, kaba treikam mardor namar ka jingsngewkhia halor ka jingpynjot ïa ka mariang ha shilynter ki lynti jngohkai pyrthei ba pawnam jong ka Shillong-Mawkdok-Sohra bad kiwei-kiwei ki jaka jngohkai pyrthei.
U District Magistrate u la ong, ka shet ka tiew ha ki rud surok da kaba pyndonkam da ki dieng thang, rnga, ki tyndong LPG ha ryngkat bad ka jingbret pathar ïa ki platik, ki jaboh jabaiñ, ki bilor, ki tin bad kiwei-kiwei ki jaboh ka la ktah ïa ka jingkhuid jingsuba, ka pynthut ïa ka leit ka wan bad ka jingma na ka jingkem ding ki khlaw nalor ba ka la pynsniew ïa ka dur jong ka Meghalaya.
Ki bor District ki la khang ruh ban bret jaboh ha ki khlaw, ki jaka um, ki nala um bad ki jaka rud surok.
Ha kajuh ka por, ki la maham ruh ba ki nongpynkheiñ aiñ kin ngat ha ka jingshah pynngat ha ka kyndon 223 jong ka Bharatiya Nyaya Sanhita (BNS), 2023, bad kiwei-kiwei ki aiñ kiba treikam.
Ïa ka hukum la pynmih namar ka jingkyrkieh jong ka jinglong jingman, ka la treikam noh mardor bad kan dang treikam haduh ban da pynmih hukum da kumwei pat.
Ki bor District ki la kyrpad ïa ki nongjngohkai pyrthei, ki nongshong shnong bad ki nongshim bynta ban ïatreilang ban pynlong ïa ka East Khasi Hills kaba khuid bad ban pynneh pynsah ïa ka nam ka Meghalaya kum ka jaka jngohkai kaba pawnam tam.
