Shillong, Nailar 05
Ka Khun Hynñiewtrep National Awakening Movement (KHNAM) ka la pynpaw ka jingbitar ïa ka Executive Committee ka Khasi Hills Autonomous District Council ba kam shym la lah ban pyllait ïa ka jingpynbna khot Tender haba ïadei ka jingaiwai ïa ki khyrdop jong ka Trade Department.
Haba kren sha ki lad pathai khubor u Bah Thomas Passah ha ka Sngi Balang u la ong ba ha ka jingshisha ka KHNAM ka la leit sha District Council da ka jingthmu ban ïakynduh ïa u CEM u Bah Winston Tony Lyngdoh hynrei u la mih noh.
U Bah Thomas u la pynkynmaw ba ha ka 27 tarik bnai Jylliew 2026 ka seng ka la leit buh dorkhas sha u Chief Executive Member (CEM) bad la pyndait lang ïa ki 11 tylli ki Work Order kiba ka KHADC ka la aiwai lyngba ka Trade Department.
“Ha kane ka dorkhas ngi la thoh shai kdar ba ka jingkwah ka jong ngi ka long ba ïa ki Check Gate kiba ka KHADC lyngba ka Trade Department ka la aiwai dei ban pyllait ha ki kot khubor bad ban khot da ka Tender” la ong u Bah Thomas.
Haba ïadei ka jingong u CEM ba ka KHADC ka la khot ïa ka Aplikeshon haba ïadei ki 11 tylli ki Check Gate ba la aiwai, u Bah Thomas u la ong ba ka don ka jingïapher hapdeng ka jingkhot Aplikeshon bad ka jingkhot Tender. “Ngi tip ba ki khot ïa ka Aplikeshon da kaba shu buh ha ka Notice Board, hynrei ngi pyrshah hi ïa kane namar dei ban khot da ka Tender bad ngi kwah ban ai ha ki kot khubor ban khot ïa kiba kwah ban shim bynta da ka Tender bad uno-uno u ba dei hok ban ïoh un ïoh” u la ong.
Katkum ka jingong u Bah Thomas, ka seng lyngba ka RTI ka la lap ba ki Check Gate ha u snem 2021-22 ki don 8 tylli, 2022- 23 ki don 8 tylli, 2023-24 ki don 9 tylli, 2024-25 ki don 3 tylli, 2025-26 ki don 10 tylli bad 2026-27 ki don 11 tylli.
Shuh-shuh halor ka jingong u CEM ba ki don ki khyrdop ba mynshwa kiba long be-aiñ, u Bah Thomas u la pynshai ïa kane ba ki khyrdop be-aiñ ki dei ki khyrdop kiba pynïaid ki riew shimet, khlem da ïoh Work Order bad khlem ïoh jingbit nangno-nangno, hynrei kitei ki khyrdop ba kren ka seng ki dei ki Khyrdop kiba la ïoh ïa ka Work Order bad kim dei kiba be-aiñ.
