Shillong, Nailar 05
Ka Meghalaya High Court kala pynksan ïa ka hukum set phatok shirta jingim ïa u Rain Dhar halor ka jingdonkti ban pynïap ïa u Trebor Hinge ha u snem 2015 ha West Jaiñtia Hills.
Ka ïingbishar ka Chief Justice Revati Mohite Dere bad Justice W Diengdoh kala kyntait ban pdiang ïa ka jingkyrpad u Dhar ha ka 4 tarik Nailar, kaba pynskhem ïa ka hukum ka ïingbishar District Session bala pynmih ha u Jymmang 2024 katkum ka Sessions Case No. 76/2015.
Ïa u Dhar la pynngat kam bymman hapoh ka kyndon 302 IPC bad ka kuna ba T.5000.
Kane ka case ka dei halor ka jingjia ba 11 tarik Rymphang, 2015 ha kaba u Hinge u la shah thombor bad shah pynïap hajan ka sem sniang hapoh ka shnong.
Ka rai pynsajia kala pynshong nongrim na ka nongai sakhi Nika Thubru, kaba pyntip ïa ka ïingbishar ba ka ïohi ïa u Dhar ba u beh bad dung da ka tari ïa u Hinge.
Ïa kane la kyrshan ruh da ka kaiphod post mortem u Dr. E Challam, kaba batai ïa bun tylli ki dak dung kum ka daw jong ka jingïap.
Ka High Court kala ong ba ka jingbatai ka nongai sakhi ha ryngkat ka sakhi medical, kala biang pura ban pynneh ïa ka hukum set phatok.
Ka ïingbishar kala bthah ruh ïa ka District Legal Services Authority, West Jaiñtia Hills ban ai jingtip hapoh ka saw taiew halor ka jingai jingïarap song pisa ba T.3 lak sha ki Kmie Kpa une u lanot.
Ïa kane ka mukotduma la buh ban bishar biang ha ka 2 tarik Nailur, 2026 ban ïoh ïa ka jubab.
