Shillong, Nailar 05
U Myntri Rangbah ka Jylla Conrad K Sangma ha ka sngi Balang u la ong ba ka Sorkar Jylla kam shym la khang ïa ka jingkhang ban ïakren bad ïatai bad kyntu ïa ka Voice of the People Party (VPP) ban pyndonkam ïa ka ïingdorbar kum ka rynsan kaba dei ban rah bad pynpaw ïa ka jingsngewkhia ka jong ki.
Kane ka jingpynpaw ka jong u, ka la wan halor ka rai jong ka VPP ban pynlong ka jingïaid bad tur paidbah kaba jai jai sha Secretariat ha ka sngi Palei ka 6 tarik Nailar, halor ka jingkynnoh ba ka Sorkar kam shym la leh eiei halor ki 10 tylli ki mat.
Haba kren sha ki nongthoh khubor, u Conrad u la ong ba ka Sorkar ka long kaba kloi bad plie beit ka jingkhang na ka bynta kino-kino ki jingïakren ne ïathir.
“Ngi long beit kiba kloi ïa kano-kano ka jingïakren. Ngi la ju kdew na ka por sha ka por ïa kane ba lada don kano-kano ka jingeh, ngi long kiba kloi ban ïakren ïa kano-kano ka kam,” ong u Conrad.
U Myntri Rangbah u la bynrap ba ka riti synshar paidbah ka bthah ba ïa kum kine ki kam dei ban rah ïakren ha ïingdorbar thawaiñ, ka ban sa shong dorbar shen.
“Kumta, lada don ïa kano-kano ka jingsngewkhia, ka ïingdorbar ka dei ka rynsan kaba biang bad kaba paka ban wanrah ïa ki mar ïatai. Hynrei lait na kata, kum ka Sorkar ngim ju khang satia ïa ka jingkhang na ka bynta jongno-jongno ruh ban wan ïakren. Namarkata, lada don kano-kano ka jingïakren, ngi long beit kiba kloi ban ïakren ïa kino-kino ki kam kiba dei jong ki paidbah bad kane ka dei ka nongrim jong ngi,” u la ong.
