Shillong, Nailar 06
Ka jingshah pynngop bad shah thok pisa jong ki briew haduh mynta ka dang ïai bteng, watla na ka liang jong ki pulit ki la dep ban pynsngewthuh bad pynshai na ka por sha ka por halor kane ka kam thok kam shukor.
Katkum ka khubor na ki pulit la ong ba uwei u rangbah uba na kawei na ki dong jong ka nongbah Shillong u la ai ka jingujor ba ha ka 22 tarik Jylliew, 2026, uwei u briew bym lah ban ithuh, uba la kam ïalade kum u nongtrei jong ka SBI, u la thok pisa ïa u, haduh kumba T.73,500/-.
Ha kawei pat ka khubor, uwei na ki nongshong shnong jong kawei na ki dong ha Tura (WGH) u la ai ka jingujor ba ha ka 28 tarik Naitung, 2026, u la ïoh pdiang ïa ka phone call na u number bym ithuh, ha kaba u nongphone u la bthah ïa u ban ‘install’ ïa kawei ka App ‘RMI Finance’, ïa kaba u la kohnguh.
Kham hadien kane ka App ka la bteng ban wanrah ïa ki OTP dalade khlem ka jingtip jong u trai bad ha kaba ka la don ka jingshah khate pisa kaba long haduh T.82,918/- na ka Bank account jong utei u briew.
