Shillong, Nailar 06
Ka Khasi Students’ Union (KSU) Shillong Mihngi Circle ka dawa na ka Sorkar Jylla ban peit bniah ïa ka jingïateh jong u snem 2018 kaba long hapdeng ka NSTDA bad ka CBI, kumjuh ban pynpra noh ïa ka jingtei be-aiñ (Temple) kaba don ha Mawdiangdiang.
Kane ka jingdawa jong ka seng ka long hadien ba ka New Shillong Township Development Agency ka la thoh sha u DIG & Head of Branch ka CBI Shillong ban pan jingshai halor ki khubor ba don ka jingtei jaka mane blei hapoh ka jaka treikam jong ka CBI kaba hap ha ka jaka jong ka Sorkar.
Ka KSU ka la pynpaw ba ha ka 6 tarik Nailar ka la ïoh jubab na ka tnad Urban Affairs haba ïadei ka jingujor jong ka halor kane ka mat.
Haba kdew sha ka Clause 10 jong ka jingïateh ba la ïasoi ha ka 14 tarik Naiwieng 2018, ka KSU ka la ong ba ym shah ban tei ne pynkylla khlem da ïoh ka jingmynjur shwa na ka NSTDA. “Katkum ka Clause 10 jong katei ka jingïateh, ym shah ban tei ïa kano-kano ka jingtei ne pynkylla ïa kano-kano ka jingtei kaba la don lypa ha katei ka jaka khlem ka jingmynjur na ka NSTDA,” la ong ka KSU.
Ka KSU ka la kyntu ïa ka Sorkar bad ïa ki bor ba dei peit ban shimkhia mardor ïa kane ka mat. “Ka KSU ka ngeit skhem ba ka Sorkar bad ki bor ba dei peit ki dei ban bishar bniah ïa ka jingïateh kular ban ai wai bad ban leh ïa kaba donkam katkum ka aiñ. Ka dawa ruh ba lada lap ba katei ka jingtei ka pynkheiñ ïa ki kyndon jong ka jingïateh, dei ban pynpra noh ïa ka katkum ka aiñ,” la ong ka KSU.
Ka KSU ka la kyntu ruh ban pynlong ka jingtohkit kaba hok, kaba shai bad kaba kloi, ka la ban jur ba ym dei ban pynlait ïa kano-kano ka jaka treikam na ki kyndon ba la buh na ka bynta ki jaka Sorkar.
Haba pynshai ïa ka nongrim, ka KSU ka la ong ba ka mat ka dei halor ka jingpynneh ïa ki kyndon, ym halor ka niam. “Ka nongrim jong kane ka jingïakhih kam dei ba pyrshah ïa kano-kano ka niam ne kano-kano ka jaidbynriew, hynrei ka jingthmu jong ka long ban pynneh ïa ka hok bad ki kyndon ka synshar khadar” la ong ka KSU.
