Nongstoiñ, Nailar 06
Ha ka sngi Ba-ar jong ka taïew ka Ri Lyngngam Traders Association (RLTA) kala ïoh ban pynkup burom ïa ki samla pule jong ka dong ka thaiñ Lyngngam ha West Khasi Hills District kiba la pass bha ha ka eksamin SSLC bad HSSLC mynta u snem 2026.
Ïa ka jingïalang pynkup burom la pynlong hapoh ka madan phutbol ka shnong Umdang ha kaba u MLA ka thaiñ u ba dei ruh u Myntri Sorkar Bah Methodius Dkhar u la long kum u kongsan ha ryngkat ka jingïadonlang u Isac Marak, MPS, SDPO ka Mawshynrut kum u symbud kongsan.
Ha katei ka sngi kila don haduh san ngut ki samla pule ka thaiñ kiba la ïoh pdiang ïa ki khusnam na ka Association bad kitei ki 5 ngut ki dei kiba la pass bha bad ïoh 80% shaneng ha ki eksamin SSLC bad HSSLC ha kaba la wan ban pdiang ïa ki khusnam da ki kmie ki kpa jong ki.
Ha kajuh ka sngi, ka RLTA kum ka jingthmu ban ai ka jingshakri sha ki paidbah ha ka pang ka shitom, ka la ïoh ruh ban pyllait paidbah ïa ka kali Ambulance, ha kaba u kongsan u la ïoh ban khap ïa u ribon bad ñiah ruh ïa ka kali kum ka dak jong ka jingpyllait paidbah.
Ka RLTA kala ïoh ruh ban pynkup burom da ki jingai sngewbha sha ki kaitor jong ka thaiñ kynthup ruh ïa ka kynhun rwai ïa kaba la lam khmat da u Bah Josephas Thongni kaba la wan ban pynshit pynshngaiñ ha kane ka sngi da ki jingrwai.
U Bah Methodius haba pynpaw ïa ka jingkmen bad ai kitbok kitrwiang ïa ki samla pule, u la ong, “Ka jinglah jong ki khun ki jong ngi ka dei u soh jong ka jingtrei shitom, ka jingminot, bad ka jingleh shitom jong phi ki kmie ki kpa.”
Ha kane ka sngi nalor ki kongsan la donlang ruh u Bah Witting Mawsor, MLA barim ka Mawshynrut, samla Franklin Syiemiong, President ka KSU West Khasi Hills District, u samla Ulysis Roben Ryntong, Chairman ka RLTA, u Sordar ka Shnong Umdang Pyllun, ki riew rangbah, ki nongkitkam ka Association bad kiwei-kiwei.
