Shillong, Nailar 06
U Bah Ardent Miller Basaiawmoit u la kop da kaba ong “Mynta ka kynti ki shu ker tawiar ïa ka Secretariat hynrei ha u snem 2028, ka VPP kan sa kurup syndon bad shong treikam ha ka ophis Secretariat”.
Ïa kane u Bah Ardent u la kop, ha ka jingkren paidbah ha Additional Secretariat, hadien ba la kut ka jingïakhih kaba jai-jai, kaba ki la ker tawiar ïa ka Secretariat ha ryngkat ki hajar ngut ki nongkyrshan.
U Bah Ardent u la ong, ba ha kine ki sngi ki la don bun ki jingkynthoh ïa ka VPP, kaba ki ong ba kadei ka seng kaba pynkulmar paidbah, hynrei kane ka jingwan ki paidbah ha ka jingïakhih, ka pynshisha ba ki mat kiba la rah na ka por sha ka por, kidei shisha ki jingeh kiba ka jaidbynriew ka ïakynduh.
“Ngi pynlong ïa kane ka jingïaid paidbah ha ka sngi longtrei ym dei ka sngi shuti bad ki paidbah ki la poi haduh katne. Kane kadei ka khubor sha kito ki briew kiba ju kynthoh ïa ka VPP,” u la ong.
Kum ki nongïalam ka VPP, ngi ïengskhem ban ïalam, ban ïada ïa ka hok longtrai ki trai muluk ki trai jaka bad ngim lah shuh ban sngap ïa ka jingleh ka Sorkar ha kine ki sngi ba mynta. Kine ki 10 tylli ki mat kiba ka party ka ju pynsngew, kidei kiba donkam na ka bynta ka jaidbynriew.
“Ka jingïaid paidbah kadei tang ka jingsdang, hynrei lada ka Sorkar kam pynsngap, ngin sa nangpynjur shuh shuh ki jingïakhih,” byrngem u Bah Ardent.
Nalor kata, u la kren ruh halor ka Public Hearing kaba la pynlong ha East Jaiñtia Hills, ha kaba u la ong ba ka party kam pdiang ïa katei ka Hearing bad ka Sorkar ka dei ban sangeh ban wanrah ki karkhana ha katei ka District, namar kam pynmyntoi ïa ki trai Jylla.
Shuh shuh u la ong ruh, ba kane ka Sorkar, kadei kaba isih ïa ki trai ri trai muluk bad kaba kmen haba ki bar jylla ki wan sha kane ka Jylla, ban knieh ïa ka kamai kajih.
U la ong ruh ba ka Sorkar ka kop ba ka la ai kam ïa ki samla hynrei kata ka jingaikam kadei ka jingsiew tulop kaba 1 sien ha ka 4 bnai, bad kam don jingmut ïa ka Sorkar ban ong ba ka la ai kam.
“Ko ki paidbah, kum u nongïalam ka party nga kwah ban ong tang kawei, ba ngim don spah, hynrei ngin sa kamtrai syndon ha u snem 2028 ïa ka Secretariat, ban long ka jingsynshar kaba khuid kaba suba. Ngin synshar ban ñiad noh ïa ki ummat jong ki longkmie, ngin ñiad ïa ki ummat jong ki shnong kiba la shah lehbeiñ ha ka Sorkar, ngin synshar ban ai ka jingkyrmen ïa ki khun samla kiba wad kam wad jam,” la bynrap u Bah Ardent.
“Ki khun ki ong ïa nga ba Papa, phi la shah byrngem ruh wat ha ki seng lehnoh, hynrei nga ong, ym leilei ‘Khun’ ngi im ha ki sngi kiba sniew, kiba ka jinglalot spah ka long kaba shyrkhei haduh katta-katta. Hynrei nga ïeng na ka bynta ka lawei jong ka jaidbynirew, kam pher lada wan kren sa mano-mano ruh, ngan nym kynrandien bad ngan ïaid shakhmat ryngkat bad ki paidbah haduh ban da poi sha ka thong. Ka thong jong ngi ka long 2028, ka VPP kan kurup ïa ka bor synshar,” la ong shuh shuh u Bah Ardent.
