Nongstoiñ, Nailar 06
Ka jingjyllei jong ki kam tuh kam thiem ha ki bynta jong ki shnong bapher-bapher jong ka West Khasi Hills na kawei ka sngi sha kawei ka nang ïai bteng, kata kum ka jingshah tuh ki jingri jingdup kum ki masi, ki blang bad kiwei-kiwei ha kaba kane kala ktah shi katdei eh ïa ki nongri jingri.
Ka khubor ba la ïoh lum la ong ba ha ka 6 tarik u Nailar, 2026 ki nongshong shnong ka shnong Nongdisong ha West Khasi Hills ki la ud la nam namar ka jingshah tuh ki blang jong ki, kiba la kot haduh 28 tylli eiei bad la suba ba katei ka jingshah tuh ka lah ban dei kaba la jia ha ka step shiteng synñia jong ka sngi Palei ha ka por kumba 1 baje eiei.
U Bah Gilbertson Peiñlang uwei na ki trai jong kitei ki blang uba na ka shnong Nongdisong u la ong, ki blang kiba la shah tuh ki dei jong ka Kong Ebelinda Peiñlang, Selvina Peiñlang bad u Corniluis Lyngkhoi.
Shuh shuh u la ong ba kitei ki lai ïing ki don marjan ïing bad ki blang kiba la jah na ki lai tylli ki sem hynrei kim shym la ïohsngew kano-kano ka jingsngew hynrei ha ka por 1 baje eiei shiteng synñia jong ka step sngi Palei, u la ïohsngew ba ka la don ka jingwiar ki ksew pynban um shym la poi pyrkhat ba kin sa dei ki nongtuh, kumta la shu antad ba ka lah ban dei ha kita ki por ba wiar ksew.
Na ka liang u Bah Gilbert u la kyntu ïa ki paidbah ba lada don kino-kino kiba ïohi ïa ki kali ne kino-kino kiba ishan khmat kin sngewbha ban bat bad ban tohkit bniah ïoh dei ki blang jong ki, u la ong.
U la ong ruh ba lada don kino-kino kiba ïoh kem kin sngewbha ban pyntip sha ki da kaba shu phone ha u number 6009793451.
