Shillong, Nailar 06
Ka Meghalaya High Court kala kdat noh sharud ïa ka hukum set along shirta jingim ïa ka Jenorin D Sangma ha ka mukotduma pynïap ïa la u kurim ha u snem 2015 ha Ri-Bhoi, haba kdew ïa ka jingduna ki sakhi sabut kiba thikna.
Ka division bench jong ka Chief Justice Revati Mohite Dere bad Justice W Diengdoh ha ka 4 tarik Nailar kala ailad ïa ka jingkyrpad jong ka (Jenorin) pyrshah ïa ka hukum ka ïingbishar District Session, Nongpoh, ba pynmih ha u bnai Rymphang 2020, kaba la pynngat sajia ïa ka hapoh ka kyndon 302 bad 201/34 IPC.
Ki ‘prosecution’ kila kynnoh ba ka Jenorin kala pynïap ïa la u kurim Dhantharu Mushahari ha u 2015 bad tep ïa ka metïap hapoh ka shnong Chibra.
Kane ka jingjia kala mih pyrthei ha u Kyllalyngkot 2017 hadien ba u Rangbah Shnong u la pyntip sha ki pulit ïa ka jingkynnoh ba ka phla hi dalade.
Ka ïingbishar ba tian bishar kala shaniah ha ki sakhi ba batai ïa ka jingjia kynthup ka jingkynnoh ba phla shabar ka ïingbishar bad ka jinglap ïa ka metïap.
Ka ïingbishar ka ong ba ki sakhi ki dang duna bha katkum ki jingdonkam ba long katkum ka aiñ.
