Shillong, Nailar 07
Ka Meghalaya Pradesh Congress Committee (MPCC) ka la pynbna ba kan pynlong ka jingïaid paidbah ha nongbah Shillong ha ka 10 tarik u Nailar ban pynpaw ïa ka jingpyrshah ïa ka jingthmu pynkylla ïa ka Foreign Contribution Regulation Act (FCRA) da kaba kdew ba kane ka jingthmu ka lah ban wanrah jingeh ïa ki jaka pule ba la pynïaid da ki kynhun niam bapher-bapher kiba don ha ka thaiñ Shatei Lam-Mihngi.
Haba kren sha ki nongthoh khubor ha ka sngi Thohdieng u Bah Eugene Jaraiñ President ka Block Congress Committee (BCC) Laitumkhrah, u la ong ba ka jingthmu ban pynkylla ïa ka FCRA, ka dei ka mat kaba ki paidbah ki dei ban sngewthuh bad ban sngewkhia bha.
“Ka Sorkar BJP ka dang pynkhreh ban mynjur ïa ka jingpynkylla ïa ka FCRA ha kano-kano ka por. Ban mynjur ïa kane ka aiñ ka donkam tang 10% ka jingwan ki MP hapoh ka ïingdorbar bad tang palat 50% na kiba don bynta ban thep vote” la ong u Bah Eugene.
Shuh-shuh u Bah Eugene u la ong ba ki shlem kiba la pynwandur ïa ka pule puthi bad ka koit ka khiah ha ka thaiñ ki don ha ka jingma. “Shibun ki briew ha ka thaiñ Shatei Lam-Mihngi ki la shah hikai ha ki skul Missionary bad bun ngut ruh la kha ha ki jaka sumar (Hospital) ba pynïaid ki Missionary. Kine ki shlem pule kiba la kyntiew ïa ka imlang sahlang jong ngi mynta ki don ha ka jingma hapoh kane ka jingpynkylla kaba la tyrwa da ka Sorkar NDA” u la ong.
U Bah Eugene u la batai ba kane ka jingïaid paidbah kan sdang naduh ka por 11 baje mynstep jong ka sngi Nyngkong (10 tarik Nailar) ka ban sdang na Fire Brigade shaduh Don Bosco Square Laitumkhrah.
“Kan long ka jingïaid paidbah kaba jar-jar, kaba ym don kano-kano ka jingpynkulmar. Ki nongkren kin sa batai ïa ki kyndon jong ka jingpynkylla sha ki paidbah” u la ong.
Namar kata u la kyntu ïa ki nongshong shnong ban pule hi dalade ïa ka Bill, da kaba leit online na Google lane ban peit na kiwei de ki lad jingïarap ban sngewthuh ïa ka jingthmu ban pynkylla ka ong kumno, bad kiei ki kyntien.
Haba bynrap u Bah Eugene u la pynshai ba ka jingïakhih kam dei satia ka kam politik. “Kane ka dei ka mat na ka bynta baroh, 70-80 snem naduh ba la ïoh ïa ka jinglaitluid ngi la shaniah ha kine ki skul, ki jaka sumar bad ki shlem shakri paidbah. Ki paidbah ki dei ban pule bniah ïa kane ka kam bad sngewthuh shano kane ka ïalam”.
