Shillong, Nailar 07:
Ki nongïalam ka Synjuk Ki Nongñiah Taxi Sor & Khapsor, ha ka 6 tarik u Nailar, 2026, ki la kyntu ïa ka Sorkar haba ka la knieh ïa u khiewja jong ki nongñiah taski ba ka dei ban ailad noh ïa ki ban kit ïa ki nongjngohkai pyrthei na Rilbong sha Sohra.
Kane ka jingpynpaw ki nongñiah taksi ka dei ha ka jingïalang ïamir jingmut ban ïakren ïa ki jingeh ha kaba ki nongñiah taksi ki hap ban mad na ka por sha ka por.
Ha kane ka jingïalang la ïadonlang da ki nongïalam bad dkhot seng kmie ka synjuk, ki nongïalam ki dkhot na kiwei-kiwei pat ki shnat treikam.
Haba ïakren bad ki nongthoh khubor hadien ba la wai ka jingïalang, u Bah Kmenlang Khonglah, President u la ong ba ka jingwanrah ka Sorkar ïa ki “Bos jong ngi” ka la ktah shibun ïa ka kamai kajih ki nongñiah kali kamai .
Shuh shuh u la ong ba kim pyrshah ïa ka jingleh ka Sorkar namar ba ka jingdon jong kitei ki bos ka ïarap shibun ïa kiba duna ha ka ïoh ka kot hynrei u la pynpaw ba ka Sorkar kan hap ban pyrkhat lem na bynta jong ki.
U la pynpaw ba ka Sorkar ka la sei ki bos saw ha kine ki 15 snem mynshwa na bynta ki paidbah hadien ki sei kali maxi cab, bos STEM ban kit khynnah skul, mynta ki sei da ka “Bos Jong ngi”, kane ka jingleh ka Sorkar kaba bha, hynrei ki la buh jingkylli kaei ba ka Sorkar ka pyrkhat ïa ki nongñiah taksi namar ma ki ruh ki hap pyndap pynbniang ïa ka ïing ka sem.
“Ngim don jingpyrshah ban pynmih ïa ka “Bos jong ngi”, hynrei ngi kyrpad ïa ka Sorkar ba kan shah ïa ngi ban kit ïa ki nongjngohkai pyrthei na Rilbong sha ki jaka sha Sohra” u la ong.
U Bah Shimladlang Rynjah pat uba dei u Working President ka synjuk u la ong ba na ka liang ka synjuk ka la phah ïa ka shithi sha u Myntri Rangbah ka Jylla halor kine ki jingeh bad kyrmen ba un shimkhia bad sngap ïa ki jingeh jong ki.
