Shillong, Nailar 07
Ki bor pynïaid ka East Khasi Hills District ki la khang pyrshah ïa ki kali baheh bad kali kamai ba kin ïeng ne sangeh ha ki rud surok (National Highways) bad kane ka hukum kan treikam noh mardor.
Ha ka hukum ba la pynmih ha ka Sngi Thohdieng da u District Magistrate u Abhilash Baranwal, IAS, u la ong ba ïa kane ka rai la shim katkum ka jingbthah jong ka Supreme Court ha ka 13 tarik Ïaïong 2026, kaba ong ba ki kali ki lah ban sangeh tang ha ki jaka ba la ithuh kyrpang ban ïeng, ki lay-byes lane ha ki Wayside Amenities.
Ki bor District ki la kdew ba ki trok bad ki kali kamai kiba pynïeng katba lap ba shem ha ki rud surok jong ki National Highway ha ka District, ka la wanrah ïa ka jingkhapngiah bad ka jingma ïa ka jingshngaiñ jong ki paidbah.
La kdew ba ka kam ka long kaba kyrkieh bad ïa kane ka hukum la pynmih katkum ka kyndon 163 jong ka Bharatiya Nagarik Suraksha Sanhita 2023.
Katkum katei ka hukum, kino-kino kiba pynkheiñ kin ngat ha ka jingpynshitom ba katkum ka kyndon 223 jong ka Bharatiya Nyaya Sanhita 2023, ryngkat bad ki kyndon jong ka Motor Vehicles Act 1988.
Kane ka hukum kan neh haduh ar bnai bad yn pynbna paidbah ha ki thanad bad ha ki khyrdop talasi kali (Transport Check-Gates) ba don ha ki surokbah.
Kane ka jingbthah ka wan kum shi bynta ban pyntreikam ïa ki kyndon ïada ha ki surok bad ban pynthikna ban ym shah pynthud ka jingïaid ki kali ha ki surok National Highways kiba ïaid lyngba ka East Khasi Hills.
