Mawkyrwat, Nailar 07
Ka Dorbar bah jong ka Hima Langrin kaba la pynlong da u Pa’iem Nangtei Syiemiong ha ka 7 tarik u Nailar, 2026 ha Phlangdiloiñ, South West Khasi Hills District ka la kylla pynban kum ka madan thma ha kaba ka la mih ka huri-hura bad ka jingkulmar kaba jur mar syn wai ka Dorbar Hima.
Ha kane ka jingjia, ka kynhun liang pyrshah ïa u Pa’iem Nangtei Syiemïong ki la bitar ïa ka jingbym ïoh lad jong ki ban kren bad ban pan pynshai ha ka Dorbar ha kaba ïadei bad ki kam hima bad ha kane ka jingjia uwei u ‘riew paidbah, u la mynsaw na ka kjat katba hynñiew ngut ki pulit ki la mynsaw bad uwei pat u la mynsaw jur na ka jingshah kawang maw ha ki paidbah.
Ka jingkhot jong u Syiem ïa kane ka Dorbar Pyllun ka long ban pynshai halor ka jingkynnoh ba u la pyndonkam bakla ïa ka pisa bad halor ka ‘Management Board’ kaba ki liang pyrshah ki la leit tur ruh sha District Council ban dawa weng Syiem ïa u Pa’iem Nangtei Syiemïong.
Ha katei ka jingjia kaba la jia ha ka Sngi Thohdieng jong ka taïew, mar ïa kut ka Dorbar Pyllun, ka kynhun jong ki liang pyrshah kiba palat hajar ngut ki la sdang ban pynkulmar da kaba pynpait bad pynjot ïa ki shuki bad kiwei ki tiar bad haba ki pulit ki la pyrshang ban pynsangeh ïa ki paidbah ban rung shapoh rynsan, ki paidbah ki la kawang maw ïa ki pulit ha kaba hynñiew ngut ki pulit ki la mynsaw katba uwei u la mynsaw jur.
Ban tem ïa kane ka jingkulmar ki pulit ki la pyndonkam da ki lyer pynsat khmat bad hadien ba la lah ban khanglad, ki paidbah na ka kynhun pyrshah ki la ïapra noh na katei ka jaka.
Na ka liang u Pa’iem Nangtei Syiemïong haba kren sha ki lad pathai khubor u la ong ba ka jingpyrshah ka dei kaba la leh da ki katto-katne ngut ki briew, kiba don jingthmu ban khwan myntoi ïa ki jingmih jingïoh napoh ka Hima, hynrei kiba bun ki paidbah kiba wan ha ka Dorbar kim don kano-kano ka jingpyrshah.
U la pynrem jur ïa kane ka jingpynkulmar jong ki liang pyrshah, ki bym shym la mudui ha ki bor jong ka aiñ, kata, ha ka District Council ne ka High Court halor ka jingshah thung biang (reinstate) jong u kum u Syiem.
Kane ka kam, kam don jingmut eiei hynrei ka dei tang ka jingleh biej bad ka kam khyllung khynnah.
Ka jingthmu ban lum ïa kane ka Dorbar Hima Pyllun ka long ban pynshai halor ka jingkynnoh jong ki liang pyrshah, kiba la leit tur ruh sha District Council. “Kat kaba dei ban pynshai ngi la pynshai lut, ngi khlem buhrieh eiei, hynrei ïa ki briew ki bym pdiang, ngim lah ban ong eiei,” ong u Pa’iem.
Katba na ka liang u Bah Wadlad Lyngdoh Langrin, nongïalam ka kynhun pyrshah u ong ba kane ka dei ka Dorbar paidbah, kaba u khun u hajar jong ka Hima u don ïa ka hok ban pynsngew ban kren ban kylli jingkylli bad ban ïathir ïatai bad ma u kum u Syiem u dei ban pynshai sha u paidbah.
“Te hadien ba ngi la pan ban kren, u Syiem u la mynjur ban shah bad ngi la ap ïa kata, hynrei kynsan-kynsan na ka liang ki briew jong u Syiem ki pynkut noh syndet ïa ka Dorbar da kaba pynbna beit ba ka Dorbar ka la wai khlem da ailad ïa u paidbah jong ka Hima ban kren wat tang uwei ruh,” u la ong.
Shuh shuh u la ong ba kawei kaba lyngngoh ka long ba ynda ki la wan ha ka Dorbar la kerkut da ki pulit palat ïa ka 500 ngut ryngkat ki ‘tear gas’ bad ki ‘stun granade’ kumjuh ki lathi.
“Mano ba khot ba aibor ban wan hangne? Ngi tikna ba don u nongkhot lym kumta kin ym wan,” ong u Bah Wadlad.
U la kynnoh ruh ba u Pa’iem Nangtei Syiemïong u la synshar donbor ïa ki paidbah bad u la pyni bor da kaba wanrah ïa ki pulit bad kheiñ ïa ki khun ki hajar kum ki lehnoh.
“Lada ïa ki khun ki hajar jong ka Hima phi pynlong lehnoh, ïano pat phin bishar bad synshar,” u la ong.
Ha kane ka sngi na ka liang ki bor distrik la ïadonlang u Bah S. Marweiñ, BDO ka Ranikor Civil Sub Division, Bah B. Kharjana, Additional SP bad kiwei-kiwei.
