Shillong, Nailar 07
U Bah Donbok Dkhar, President ka Hynñiewtrep Integrated Territorial Oraganization (HITO) u la ong ba ka seng ka wan ban ïasnokti lang ha ka jingïaid paidbah ba la pynlong ka Voice of the People Party (VPP), ym ba ka kyrshan ïa ka seng saiñpyrthei, hynrei ka wan ban ai ka jingkyrshan ïa ki mat jingdawa na ka Sorkar.
Haba kren sha ki lad pathai khubor u Bah Donbok u la ong ba kane ka jingïaid paidbah, kadei kum shibynta ban pynsngew ïa ka jingsngap jar ka Sorkar Jylla ïa ki 10 tylli ki mat, kiba pynsngew da ka VPP.
“Ngi don ruh ki katto katne ki mat, kiba ktah ïa ka jaidbynriew ka bri u hynñiewtrep. Kane ka jingmih paidbah ba la pynlong ka VPP, kidei ki mat kiba ktah ïa ka jaidbynriew,” u la ong.
Haba ïadei bad ka jingshah kynthoh ka HITO, u Bah Donbok u ong “Kane ka jingshah kynthoh ka seng kam sngew phylla shuh, namar kum ka sengtrei mon sngewbha , kan mih shakhmat ba dawa ïa ki hok na ka bynta ka jingbha ka ri bad ka jaidbynriew”.
U la ong ba ka HITO ka wan ban shimbynta lang ha ka jingïakhih ka dei ban dawa na ka Sorkar ba kadei ban sospon ïa u SP DC, ka East Jaiñtia Hills, uba la bthah ban tih ïa ka surok, hadien ka jingmih ka jingpyrshah ha ka por ba pynlong ïa ka hearing bad kiwei-kiwei de ki mat kiba ktah ïa ka jaidbynriew.
“Ka jingmih madan jong ka HITO ryngkat bad ka VPP, kadei na ka bynta ki mat kiba ka seng ruh ka la ju ïai dawa na ka por sha ka por,” u la bynrap.
U Bah Donbok u la kynthoh ruh, ba kane ka Sorkar ba mynta, kadei ka Sorkar kaba ïada mynder bad ka Sorkar kaba ïarap mynder, bad kadei ka Sorkar kaba ailad ïa u mynder ban knieh ym tang ïa ka jakpoh hynrei wat ïa ka hok ruh.
“Ngin ïeng beit ha ka nongrim kaba skhem, ngin kyrshan ïa ki polisi bad kino-kino ki seng saiñ hima sima, kiba ïeng ha ka nongrim na bynta ka jaidbynriew. Ngin kynthoh ruh ïa kino-kino ki seng saiñpyrthei, kiba lehbeiñ leh khoh ïa ki nongshong shnong,” la ong u Bah Donbok.
