Shillong, Nailar 07
U Myntri ka tnad pule-puthi, u Bah Lahkmen Rymbui ha ka Sngi Thohdieng u la ong ba ka Sorkar Pdeng ka la pyllait ïa ka bhah ba sahteng jong ka (Sorkar Pdeng) na ka bynta ki nonghikai SSA, bad ïa ka tulop na ka bynta u bnai Jymmang, Jylliew bad Naitung yn sa siew noh shen.
Haba kren sha ki lad pathai khubor, u Bah Rymbui u la ong ba ki nonghikai ki la ïoh pdiang tang ïa ka bhah jong ka Jylla naduh u bnai Ïaïong namar ka jingslem jong ka pisa na ka liang ka Sorkar Pdeng.
“Nga la rah ïa kane ka mat ha ka jingïalang jong ki Myntri pule-puthi ha Delhi ha ka 22-23 tarik Naitung. Nga la pyntip sha ka Sorkar India ba ha Meghalaya, ngi la pyllait tang ïa ka bhah jong ka Jylla,” la ong u Bah Rymbui.
U la ong ruh ba u Myntri Sorkar Pdeng u la pyntikna ba ïa ka pisa yn sa pyllait hapoh shi taïew.
“Ïa ka pisa mynta la pyllait sha ki distrik bapher-bapher. Ïa ka bhah Sorkar Pdeng kaba dang sahteng na ka bynta u bnai Jymmang, Jylliew bad Naitung yn sa siew sha ki nonghikai ha ka por kaba biang,” bynrap u Myntri.
