Shillong, Nailar 09
Ka Thma U Rangli-Juki (TUR) ha ka Sngi U Blei ka la dawa ban pynsangeh noh mardor ïa ka jingthmu ban shna ïa ka Shillong Peak Ropeway, da kaba khot ïa kane ka “Tourism Eyewash” ka ban pynjulor ïa ki tyllong um, ban pynkiew ïa ka jingma jong ka jingtwa khyndew bad ban ïaid lait ïa ka jingmynjur jong ki paidbah.
Ka nongïalam ka TUR ka Kong Angela Rangad ka la buh jingkylli halor ka jingdonkam ïa kane ka projek kaba 151 klur tyngka bad kaba jrong 896 meter.
“Ka jingkylli kaba nyngkong eh kaba ka TUR ka kwah ban kylli ka long hato ngi donkam shisha ïa kane ka lynti ïaid nar?” ka la ong.
“Ngi pyrshah ïa kum kine ki projek pynroi kiba khlem jingmut kiba lyngkot tang ka jingleh thok jong ka kam jngohkai pyrthei kaba buh jingma ïa ka jingshngain jong ka um bad ka jingshngain jong kiba bun ki nongshong shnong.”
Ka TUR ka la kyntait ïa ka jingong jong ka Sorkar “ka jingktah kaba rit eh ïa ka mariang”. Ka la ong ba ka jingpom ïa ki 545 tylli ki dieng ha ki jaka ba jrong kan pynthut ïa ki thliew um bad ki wah kiba ai um ïa ka nongbah Shillong.
“Ka jingpom ïa ki 545 tylli ki dieng kan pynthut shirta ïa ka jaka pynlang um bad kan pynrkhiang ïa ki wah ba marjan ym tang ki nongshong shnong jong ki jaka ba marjan kiba ïoh ïa ka um jong ki na kane ka jaka,” la ong ka Kong Angela.
“Ka jingpom pathar ïa ki khlaw ha ki jaka ba jrong bad ba jur slap ruh ka pynkiew beit ïa ka jingma jong ka jingtwa khyndew kaba jur.”
Ka kynhun ka la khot ïa katei ka jingpynlut “ba pynsyrwa kai” hapdeng ka jingduna um bad ki surok kiba sniew.
“Ka jingpynlut kaba palat ïa ka 151 klur tyngka ha ka jingleit jngohkai pyrthei kaba rem dor ka long ka jingpynshitom beiñ ïa ki nongshong shnong kiba mad ïa ka jingduna um man ka sngi, ki surok kiba sniew, bad ki kali paidbah ki bym biang,” ka la ong.
Ka TUR ka la bynrap ba ka lynti ïaid kali kan pynsniew ïa ka jingkhapngiah da kaba khring ïa “Ki hajar tylli ki kali nongjngohkai pyrthei sha ki jaka sah kiba rit” bad ka la kyntait ïa ki jingkynnoh ba kan ïarap ïa ki nongrep”.
Ka TUR ka la kynnoh ba la pyntrei ïa ka projek khlem ka jingïamir jingmut kaba janai.
“Kaei kane ka jingkylla ha ka ktien sha ka Riat Laban na ka Raid Laban kaba la don lypa ha ki jingpynbna ba mynshwa? Ka jingïamir jingmut kaba la jied bad ka kynhun barit jong ki nongmihkhmat kam dei ka jingmynjur jong ki nongshong shnong,” ong ka kyrwoh.
“Ki nongwan jngohkai pyrthei ki wan sha Meghalaya na ka bynta ka jingitynnad jong ka mariang kaba la shah pynduh noh stet da ki tower nar,” la ong ka Kong Angela bad bynrap ba ka pisa kan kham bha ban pynlut ha ki lynti ïaid kjat bad ban aikam ïa ki trai jylla.
