Shillong, Nailar 09
U Symbud Myntri Rangbah ka Jylla Bah Sniawbhalang Dhar u la ong ba ka Sorkar NPP ka la ïakhun ha ka liang ki kam jngohkai pyrthei, ki surok, ki kam ïalehkai bad kiwei ki bynta, kaba la kyntiew ïa ka roi ka par jong ka Meghalaya bad ïarap ïa ki samla na ki ka ba sniew.
Haba ai jingkren ha ka jingïalang ïalap ilekshon ha Rymbai ha East Jaiñtia Hills na ka bynta u kyrtong ka NPP Dr DRL Nonglait ban ïakhun ïa ka ilekshon MP shiteng samoi na Shillong, u Bah Sniawbhalang u la ong ba ka ïoh ka kot jong ka Jylla ka la myntoi shibun na ka kam jngohkai pyrthei ha kine ki 8 tylli ki snem.
“Kham mynshwa ka mang tyngka na ka bynta ka tnad Tourism kam kot wat tang kumba T.40-50 klur. Hynrei mynta ka la kot sha ka T.1000 klur manla u snem,” u la ong bad bynrap ba na ki jingkheiñ ba la ïoh na ka khyrdop na Umling, ka pyni ba haduh 7 ne 8 hajar tylli ki kali jong ki nongwankai ki rung shapoh ka jylla manla ka sngi.
“Kata ka mut ba haduh 32,000 ngut ki nongjngohkai. Lada uwei pa uwei u pynlut tang kumba T.1000, kata ka mut T.3.20 klur ha ka sngi sngi bad T.1300 klur ha ka shi snem. Kane ka dei ka pisa kaba wan beit sha Meghalaya,” u la ong.
U la pyntip ruh ba ka jingdon jong ki ‘homestays’ ne ki ïing basa ka la kiew na ka 500 sha ka 5000 tylli bad kane ka dei namar ka jingïarap jong ka Sorkar ïa ki trai shnong.
Halor ki jingtei, u Bah Sniawbha u la ong ba T.11,000 klur na ka pla tyngka ka Jylla la pynlut ha kine ki 8 snem ban kyntiew ïa ki surok rim kiba kot sha ka 3100 km bad tei thymmai ïa ka surok kaba haduh 1600 km.
U la kdew ruh ba ka pisa T.21,000 klur na ka bynta ka projek na Lad Umroi sha Ratacherra la dep ban mang da u Myntri Rangbahduh ka Ri kum kaba nyngkong na ka bynta ka jylla.
Haba ong ba ka NPP ka dei ka ïing kaba tylli kawei, u Bah Sniawbhalang u la kyntu ïa ki nongthep vote ban jied ïa u Dr Nonglait ba un long ka sur jong ki nong Meghalaya ha Parliament.
