Shillong, Nailar 09
U Bah Ardent Miller Basaiawmoit, President ka Voice of the Peoples Party (VPP), uba dei ruh u MLA ka Nongkrem Konstitwensi, u la buh jingkylli, ba la leh aiu ïa kiba khlong ïa ka surok ha ka sngi ba pynlong ïa ka Public Hearing, ban thmu khlong ïa u mawshun da ka Shree Cement Limited, haba bunsien ïa kiba khlong ïa ka surok pat la thep da ka FIR.
Ia kane u Bah Ardent u la buh jingkylli halor ka jingkylli ki nongthoh khubor, ba u ïohi kumno ïa ka jingpynlong ïa ka public hearing da ka Meghalaya State Pollution Control Board (MSPCB), myn ha ka 31 tarik u Nailar 2026, ba la pynlong ha Lum Syrman.
Halor kane ka jingpynlong ïa ka public hearing, la mih ka jingkynnoh, ba ïa kiba pyrshah, la shah pakhang noh ha ki lynti ba rung sha ka public hearing, ban ïoh pynsngew ïa ki jingkwah jongki.
U Bah Ardent u la ong, ba ka party kam pdiang ïa kane ka public hearing, bad ong ba kane kadei ban shah
pynsangeh namar kane kam ïaid katkum ki kyndon jong ka aiñ.
“Ka Sorkar, haba ka khot ïa ka public hearing, kadei ban sngethuh ba kadei ban sngap ïa kiba pyrshah bad kiba ïashah, hynrei ka Sorkar pat kam ai ïa kaba kum kata ka lad bad kaba sngewsih ka long kadon ka jingtih surok ban khang ïa kiba rung sha ka public hearing,” la ong u Bah Ardent.
“Lada ki Samla jong ngi ki sngewkhia ïa ka kam bamsap bad jingtrei torti ïa ki surok, ki leit khyllie ïa ka surok, la shah ai FIR, hynrei kaei ban ka ban jia ïa kitu kiba tih khnang, ban pynsniew ïa ka surok,” u la bynrap.
Kumta u la ong ba katu ka jingleh, ka la pynsuba sniew ba ka Sorkar hi ka thmu ba kaei kaba mih na ka public hearing kadei ban ïaid beit, nakata ka daw kim kwah ïa kiba pyrshah ba kin ïa don bynta.
Haba kylli, ba lehse ka don ka jingïasngewthuh jingmut ka Sorkar bad ka Shree Cement, u Bah Ardent u ong “Wat ki paidbah ruh ki ïohi kumta”.
