Shillong, Nailar 09
Ka tnad jngohkai pyrthei ka Jylla ha ka Sngi Saitjaiñ ka la ong ba ka projek ‘Shillong Ropeway’ ba la tyrwa kan ym ktah ïa ki tyllong um lane ïa ka mei mariang.
Kane ka long hadien ka jingjurip lang ïa ka jaka bad ka tnad PHE, ka tnad khlaw, ka Shillong Municipal Board bad ka Raid Laban Dorbar Pyllun.
Na ka liang ka Joint Secretary ka tnad jngoh kai pyrthei, Kong R.M. Kurbah ka la ong ba la dep ban shimkhia ïa ki jingeh haba ïadei bad ka um.
“Ka tyllong um ka don kham shakhmat shaphang Lawsohtun, kham pajih na ka skul Nepali. Kam don jingïadei eiei bad kane ka lynter jaka kaba heh 800 mitar tam. Ym don tyllong um ha kane ka lynter baroh kawei,” ka la ong.
Ka Kong Kurbah ka la ong ba la pynkylla ïa ka Detailed Project Report (DPR) hadien ba la don ki jingpyrshah halor ka jingjrong kaba 25 mitar jong ki ‘Cable’ ha kaba sdang, kaba lah ban ïalam sha ka jingdonkam ban pom ïa bun tylli ki dieng.
“Ngi la kyrpad ba dei ban pynkiew ïa ki ‘Cable’ bad ki ‘Tower’. Mynta ngi la don ïa ka DPR kaba thymmai ha ryngkat 40 mitar ka jingjrong,” ka la ong.
Ka la pynshai ba ka jingpynkhyllem dieng kan long tang ha ki 6 tylli ki jaka ba buh ïa ki ‘Tower’ ha ka jingheh kaba 12×12 mitar kawei-kawei.
“Ngi la pom tang 544 tylli ki dieng ha ki jaka ban buh ïa ki ‘Tower’, baroh hapoh ka jaka khlaw. Ngi la thung 5,044 tylli ki dieng kum shi bynta jong ka jingthung dieng ba kongsan, kata 1:10 ha ka jaka Sorkar,” la ong ka Kong Kurbah.
Halor ka jingktah ïa ka mariang, ka la ong, “Kane ka projek kam ktah ïa ka um ne ïa ka mei mariang. Ha ka jingshisha, kan pynitynnad shuh-shuh ïa kane ka jaka. Ka dei ka projek kaba kongsan bha na ka bynta ka Jylla.”
Ha kajuh ka por, ka Kong Kurbah ka la ai nuksa ïa ka ‘Intra-City Ropeway’ jong ka Sikkim bad kyntu ïa ki nongshong shnong ban leit mih sha ka tnad ban ïoh jingshai.
“Ngi kyrpad ïa baroh ba kin sngewbha ban pyrshang ban sngewthuh lem. Lada ka ktah ïa phi ne ïano-ïano ruh, wan sha ka tnad. Ngin ai ïa ka jingshai,” ka la ong.
Halor ki jingeh na ka jingtwa khyndew, ka la bynrap ba yn ïaid shakhmat bad ki kam pynbha ïa ki jaka ba sharing bad ïa ka jingjyrngam ha ki jaka ba la ot yn khmih da ka tnad khlaw.
U Project Head jong ka KEC-TCL, u J.P. Singh u la ong ba ka kompeni ka pyntikna ban bud ryntih ïa baroh ki kyndon kiba ïadei bad ka mariang.
“Na ka bynta kano-kano ka ‘Ropeway’, ki jingeh ba kongsan ki long ka jingkit ïa ki tiar ki tar bad ka jingïada ïa ka mariang na ka bynta ka jingmyntoi kaba kham heh jong ki briew ka thaiñ. Ngin pyntikna ba kan ym jia eiei pyrshah ïa ka mariang bad ka jinglong-jingman mariang jong ka thaiñ,” la ong u Singh.
