Shillong, Nailar 09
Ki karkhana thaiñ jaiñ kila ïai bteng ban long ki tyllong ka kamai jakpoh ha ki thaiñ nongkyndong jong ka Meghalaya, da kaba kyrshan ïa palat 50,000 tylli ki longïing ha kylleng ki bynta jong ka Jylla, ha kaba ki kynthei kila don palat ïa ka 70 percent ban trei ïa kane ka kam, la ong u Myntri Sorkar uba khmih ïa ka tnad Textiles Bah Metbah Lyngdoh ha ka sngi Thohdieng.
U Bah Metbah u la kren ïa katei ha ka jingplie ïa ka Handloom Week ha State Guest House kaba la pynlong da ka tnad Textiles kum shi bynta jong ka jingrakhe ïa ka National Handloom Day 2026.
U Myntri Sorkar u la leit ban jngoh ïa ki dukan kiba pyni nam ïa ki mar kiba la pynmih da ki nongthaiñ ka Jylla, ha ryngkat ka jingdonlang u Principal Secretary jong ka tnad Textiles u Bah F.R. Kharkongor, ki heh ophisar Sorkar bad kiwei-kiwei.
Nalor kane, u la pdiang ruh ïa ka lama jong ka ri hapoh jong ka mat “Har Ghar Tiranga” Campaign.
Haba kren ha ka jingïalang, u Bah Metbah u la ong, ka National Handloom Day ka dei ka sngi kaba kyrpang ban burom ïa ka jingtrei shitom, ka sap ka phong bad ïa ka jingtbit jong ki nongthaiñ kti ïa ki jaiñ bad ka jingai jingithuh ïa ka jingtrei shitom lang jong baroh kiba donbynta lang ha ka kam ha kaban pynkhlain ïa katei ka bynta.
“Ka Handloom ne jingthaiñ jaiñ da ki kti, ka dei ka karkhana kaba ïai bteng ban long kaba kongsan ban kyntiew ïa ka ïohkam ïohjam ha ki thaiñ nongkyndong, khamtam ha kaban kyrshan ïa ki longïing longsem kaba palat ïa 50,000 tylli ki ïing kaba kynthup ïa ki kynthei haduh 70% kiba trei ha kane ka kam,” ong u Bah Metbah.
U la pynpaw ba ka kamram jong ka Handloom ban pynneh pynsah ïa ka jingriewspah ka Jylla Meghalaya ïa ki riti dustur bad ki kolshor kiba la rim la jah lyngba ka kam thaiñ jaiñ bad u la ong, ba ïa ka National Handloom Day, la pynlong man la ka snem ha ka 7 tarik u Nailar kum shi bynta ban kynmaw burom ïa ka Swadeshi Movement 1905, kaba ai mynsiem ïa ki karkhana tynrai bad ban pyndonkam ïa ki mar kiba la pynmih hi hapoh jong ka ri.
U Myntri Sorkar u la ong, ka tnad Textiles kala pyntreikam ïa kiba bun ki skhim jong ka Sorkar Pdeng bad Sorkar Jylla ban pynkhlain ïa ki jingtei, ban kyntiew ïa ki sap ki phong, ban kyrshan ïa ki nongrep, ki nongthaiñ bad ïa ki lad ban pynïaid ha ki ïew ki hat khnang ba ki nongthaiñ jaiñ kin ïohpdiang da ka dor kaba biang bha ïa ki mar kiba kila pynmih.
U la kyntu ïa baroh kiba donbynta ba kin bteng ban ïatreilang ban pynkhlain ïa ka ‘Handloom’ kam thaiñ jaiñ ha ka Jylla bad ban ïada ïa ka jingriewspah kaba naduh hyndai hynthai na ka bynta ki pateng ki ban dang wan.
