Shillong, Nailar 09
U Myntri Sorkar, uba dei ruh u nongïalam ka UDP, Bah Lahkmen Rymbui ha ka Sngi Thohdieng ka taïew ba la lah, u la kyntu ïa ka Sorkar Pdeng, ban pynkylla ïa ka FCRA Amendment Bill, 2026 (kaba la tyrwa) da kaba maham ba ka bor jong ka, ka lah ban ktah ïa ki Balang, ki skul bad kiwei-kiwei ki shlem treikam ha Meghalaya.
Haba kren sha ki lad pathai khubor, u Bah Rymbui u la ong ba la ïathuh ba ka ‘Bill’ ka ai ka bor kaba khraw sha ki bor ba dei khmih ban knieh ïa ki jingdon-jingem jaka halor ki jingduna jong ka FCRA, kynthup ïa ka jingpynslem ban pynthymmai ne ka jingkut por noh jong ki syrnot.
“Shisien ba phi la pynrung kyrteng na ka bynta ka FCRA, ka long haduh bym ju kut. Tad haduh bad lymda phi bud ïa baroh kiei-kiei, ka don ka bor ban knieh ïa ka jingdon-jingem jaka. Kane ka long kaba ma shibun,” la ong u Bah Rymbui.
U la pynsngew ruh halor ka jingtyrwa ban pynjlan ïa ka jingkitkhlieh sha baroh ki nongtrei ba kongsan jong kano-kano ka seng ne kynhun.
“Mynta ki la batai ba ka jingkitkhlieh kan ym long tang bad ki nongkitkam. Kam dei tang ka jingkitkhlieh jong ka ‘Trust’, ka dei ka jingkitkhlieh shimet,” u la ong.
U Bah Rymbui u la ong ba kan long kaba eh shi kat dei ïa ki shlem pule ban sei ïa ki rekod kiba lah da ki phew snem, da kaba phai dien biang.
U la kyrpad ba ïa ki pisa ba la ïoh pdiang shuwa ban wanrah jingkylla, lada la mynjur, dei ban pyllait bad ba ki kyndon thymmai kin treikam tang ïa ki jingbei pisa bathymmai. U Myntri u la kyrpad ruh ïa ki lad jingïada na ka bynta ki kynhun niam bad ki shlem pule.
“Ngi kwah ba ka Sorkar kan bsut ïa ka kyndon ba na ka bynta ki Balang, ki skul, ki ‘Hostel’, ki kolej bad ki skulbah, lada don ki jingbakla kiba rit, dei ban pynshitom, ym pat ban knieh ïa ki jingdon-jingem jaka,” u la ong.
Ha kajuh ka por, u la maham ba ha ka por ba pynsangeh ïa ka laisen FCRA, ka jingpynïaid ïa ki shlem ka lah ban leit sha ka bor ba dei khmih.
“Lada pynsangeh 5-10 snem, kata ka mut baroh ki skul, ki Hospital bad ki Hostel kin hap hapoh ka jingpeit jong ki bor ba dei khmih,” la ong u Bah Rymbui.
Shuh shuh u la kdew ba u Myntri Rangbah ka Jylla, u Conrad Sangma u la dep ban ïakynduh ïa u Myntri Sorkar Pdeng ryngkat ki nongïalam niam ban pynsngew ïa ki jingsngewkhia jong ka Jylla.
“Ngi don ryngkat bad ka Sorkar ban rat dyngkhong ïa kino-kino ki NGO kiba pyndonkam bakla ïa ka pisa nabar ri. Hynrei ngi kwah ïa ka jingkylla ha katto-katne ki kyndon khnang ba kin ym ktah ïa ka jingïatylli bad ka jingïar paidbah, khamtam jong ka Jylla Meghalaya jong ngi,” la ong u Bah Rymbui.
