Jowai, Nailar 09
Ka All Jaiñtia Contractor and Supplier Association (AJCSA) ha ka jingïalang kaba la long ha ka sngi Saitjaiñ, kala kyrpad ïa ka Sorkar ban pyllait noh ïa ka Bill ba dangsah jong ka JJM.
Ïa ka jingïalang la pynlong ha ïing treikam ka Kur Phawa Siangshai kaba don ha Ialong.
Hadien ka jingïalang, u President ka seng Ma Welcome Langi haba kren sha ki nongthoh khubor u la ong, ha ka jingïalang la ïakren ïa kiba bun ki kam ba ïadei na ka bynta ka bha ka miat jong ki kontraktor.
U la pyntip ba ka Bill jong ka JJM kala sahteng da ki bun tylli ki snem namar ka jingbym siew ka Sorkar bad ha kine ki sngi kiba la dep ka Sorkar kala ïoh T.336 klur tam bad la khmih lynti ba ka Sorkar kan siew noh ïa kane ka pisa hynrei namar ka jingbym hun halor kumno ka jingsiew, kumta ka seng kala pynbeit ban ïakynduh shwa bad u Chief Engineer ban pyrkhat halor kane.
Shuh shuh u la ïathuh ba don ki kontraktor ki bym pat shai haba ïadei bad ka Clearance Certificate ka Sales Tax ha kaba yn thoh sha ka Sorkar ban pynshai halor kane.
Ka seng kala kyrpad ïa ka Sorkar ban pyllait noh ïa ka Bill ba dangsah jong ka JJM lym kumta ka seng kan pyrkhat da kawei ka sienjam.
