Shillong Nailar 09
Ka jingïaid biang jong ki kali na ka bynta jong ka surok Shillong-Dawki, kan sa plie noh naduh ka 10 tarik mynta u bnai, kata ka sngi Nyngkong, hynrei ka jingkhang pat ha ka por mynmiet kan dang ïai bteng.
Ïa kane la pyntip da u Additional Deputy Commissioner ka Pynursla Civil Sub-Division ha ka kyrwoh khubor ba la pyllait ha ka sngi U Blei ha kaba la pynmih ïa ka jingpynbna ban plie noh ïa ka bynta jong ka surok Shillong-Dawki (NH-206) bala khang, naduh ka 10 tarik u Nailar ban ïaid baroh ki kali. Katkum ka jingpynbna u Bah G. Warjri, ADC ka Pynursla Civil Sub-Division, u la ïathuh ba ïa kane ka jingpynbna la pynmih hadien ka jingwan jurip lang ha ka 8 tarik u Nailar bad ki heh ophisar jong ka NHIDCL, Executive Engineer PWD (Roads), Pynursla Division, Pynursla.
U la pyntip sha ki paidbah bad sha baroh ki nongleit nongwan ba ka surok Laitlyngkot-Lyngkyrdem (Chainage Kms 24+00 – 37+00) jong ka Shillong-Dawki Road (NH-206) yn plie noh naduh ka 10 tarik u Nailar na ka bynta ban ïaid baroh ki jait kali.
U la pynpaw pat ba ka jingkhang ïa ki kali ban ïaid ha ka por mynmiet kan dang ïai bteng naduh ka por 10 baje mynmiet haduh 5 baje mynstep bad la kyntu ïa baroh ki nongleit nongwan ba kin bud ryntih ïa kane bad ïa ki jingbthah kiba la pynmih da ki bor kiba dei khmih.
Namar ka jingwan ka aiom lyiur bad ka jingslap kaba lah ban mih ki jingtwa khyndew, ka jinghap ki maw bad ka jingbym shngain ki surok, kumta la kyntu jur ïa baroh ki nongleit nongwan bad ïa ki paidbah ba ki dei ban long kiba phikir bha haba ki leit jingleit lyngba katei ka surok.
U la kyntu ïa ki paidbah ba kin kiar ïa kino kino ki jingleit ki bym donkam ha ka por ba jur bha u slap ne mar ïa dep ther u lapbah bad ha ka por mynmiet.
Lah ban shah ïaid ïa ki kali kum ki Ambulance, Fire Service bad Pulit ha ki por ba khang ïa ka surok bad ki lah ban phone ha thanad Pynursla ha u Phone Number: 9862251116 khnang ban khmih ïa ka jingshngain da ki bor kiba dei khmih kiba don ha katei ka jaka.
La kyntu ruh ïa ki paidbah ba kin ai ka jingïatreilang bad ban bud ryntih ïa ki rukom pynïaid kali kiba la pyntreikam na ka bynta ka bha bad ka jingshngain jong ki paidbah bad ban plie lad ïa ka jingtrei kam ha ka por ïa ka jingshna ïa katei ka projek.
