Mawkyrwat, Nailar 09
Ka Seng Samla Hima Langrin (CEC) lyngba ka kyrwoh khubor na u Bah P.S. Lyngdoh, President ka la pynrem jur ïa ka jingwan shim kabu bad wan leh ‘riewkhlaw jong ki briew kiba wan pynjakhlia ïa ka dong ka thaiñ ka shnong ka ‘Headquarter’ jong ka Hima ha ka 7 tarik u Nailar, 2026 hadien ba wai ka Dorbar Pyllun jong ka Hima.
Katkum ka kyrwoh khubor, u Bah P.S. Lyngdoh u la ong ba ka Dorbar Hima ka dei ban ïatai ïathir da ka bor jabieng ym da kaba pynibor met mano ba khlaiñ.
Ka Dorbar Hima kam dei ka lympung ïatem ksing ïa put bisli. Ka dei ka lympung ban ïa shut jabieng ym dei ka rynsan pyni doh ksah. Bad kaei ba jia mynne ka long ka bym itynnad ha kaba ha ka Dorbar ym don ba lait ang ne nang kren ne kylli jingkylli ynda lah wai ka Dorbar pat sa ïa pynpait shuki pynpait tiar, u la ong.
“Ngi kyntu ïa u Syiem, u khlieh ka hima ban leh eiei bad pynshitom ïa kito ki nong pynkullmar hadien ba wai ka Dorbar ban ‘Suspend’ ïa ki katto-katne snem ba kin ym lah shuh ban ïashim bynta ne shong Dorbar tad haduh kin da panmap na ki khun ki hajar lyngba ka Executive Dorbar bad ruh ha ka Dorbar paidbah namar lyngba ka jingwan Dorbar kiba kum kine kan wanrah ka jingdkoh wanrah ruh ïa ka jingbym shngaiñ ïa ki dkhot ba wan Dorbar kiba don hok ïa ka mynsiem jingkitkhlieh ban ïatai-ïathir bad ïatei na bynta ka bha ka miat ka it ka Hima hi baroh kawei,” u la ong.
U la ong ruh ba haba wan Dorbar bad kim hun ïa ka jingïatai ïathir ki dei ban ïaid shakhmat da ka lynti jong ka aiñ namar ka ïingkashari ka don lada don ka jingbym hun, ki dei ban tied jingkhang sha kashari khnang ba kin ïoh ïa ka hok jong ki lada ki sngewthuh ba ka hok jong ki ka shah khñiot hynrei ym da ka lynti ban wanrah ne thaw jingkulmar ka ‘Headquarter’ jong ka Hima Langrin.
“Kam dei shuh ba dang ïa phong da ki sla dieng sla siej hynrei ki dei ki briew ba lah shai la nang la stad bad kiew ha ki liang baroh lait noh sa tang ka surok namar ka jingbym ler u nongmihkhmat ne u MLA u MDC namarkata wat wan pynjah burom ne pynlehraiñ ïa ka dong ka thaiñ ka shnong ka thaw,” u la ong.
Shuh shuh u la bynrap, “Kane ka long ruh ka nuksa ba sniew haduh katta-katta bad ka bym itynnad namar kata na ka liang jong ngi kum ka seng ngin sa shim da kiwei ki sienjam ban ai jingsneng ïa kine kiba donkti ba wan pynjakhlia ïa ka dong ka thaiñ bad ngi phah ruh ka kyrwoh sha u nong ‘sponsored’ ba katba phi dang mlien ban pyndonkam da ki ‘gang’ ban ïoh kheit ïa u soh ba phi ibang eh da lei-lei phin ym poi sha ka thong bad kan dang ngam pynban ka iktiar bad phin dang duh jingshaniah shuh shuh na ki paidbah, bad to shim ïa kane kum ka jinghikai ba lada don tang ka pisa khlem ka jabieng phin ym lah ban thaw pyrthei bad poi shaei-shaei.”
