Shillong, Nailar 09
Ka Khasi Students Union (KSU) Upper Shillong Circle, ka la pynthymmai ïa ki nongkitkam bad ki dkhot ba thymmai na ka bynta ka samoi treikam jong u snem 2026-29 ha ka jingïalang ba la pynlong ha ka VTC Hall, 6 Mer, Upper Shillong.
U Samla Raymond Kharjana, President ka KSU Central Executive Council (CEC), u la shim ïa ka bynta ban pynskhem bad pynbam smai ïa ki nongkitkam ba thymmai.
Ki nongïalam ba ha khmat jong ka KSU Upper Shillong Circle, kiba la shah jied ki long u Samla Pynskhemlang Syiem, kum u President ba thymmai bad u Samla Hopeful BVorn Lyngdoh Mawnai, Vice President.
Nangta, ïa ka kam General Secretary la bat da u Samla Nangshngaiñ Lakiang, katba u Samla Wankit Kharumnuid pat u la shah jied kum u Assistant General Secretary.
Ha kane ka sngi, la ïadon ryngkatlang ruh naduh u President barim ka KSU CEC, u Samla Lambokstarwell Marngar, u Organising Secretary ka KSU CEC, u Samla Cleenstar Shabong bad u Assistant Organising Secretary ka KSU CEC, u Samla Sandy Sohtun.
Shuh shuh, la pynphuh pynphieng ïa kane ka jingïalang da ka jingshah khot sngewbha ki Rangbah Shnong na ka thaïñ Upper Shillong bad Mylliem, ki Seng Samla, ki Seng Longkmie, bad ki nongïalam na ki Circle bapher bapher ka sor Shillong.
Ha ka juh ka por, ka KSU Upper Shillong Circle ka la pynkup burom kyrpang ïa ar ngut ki nongïalam barim kiba la shongthait na ka seng, hadien ka jingshakri kaba la slem kaba ki lah ai, kata ka long ïa u Samla Shngainlang Sohkhlet, President barim, uba la shakri naduh u snem 2001 haduh 2026 bad u Samla Wanpynshngain Kharbani, Education Secretary barim uba la shakri naduh u snem 2011 haduh 2026.
