Shillong, Nailar 09
Ka Dorbar shnong Majai da kawei ka sur ka la rai ban pyrshah ïa ka shithi ba la phah da u Acting Chief ka Hima Sohra, kaba kdew ba la weng Sordar ïa u Bah Balajied Ïawbor uba long kum u Acting Sordar ka Majai-Bholaganj.
Ka ophis u Syiem ka Hima Sohra ha ka 01 tarik u Nailar 2026 ka la phah shithi sha u Bah Balajied Ïawbor, Acting Sordar Majai-Bholaganj bad ïa katei ka shithi la soi da u Bah Mynjurlang Majaw uba long u Acting Chief ka Hima Sohra.
Kane ka shithi ka kdew, ba ka Durbar u Acting Chief ka Hima Sohra hadien ba ka la peit sani bha ïa ki riti dustur-synshar khadar halor ki khlieh briew kiba-shong ba-sah ha khyndew Majai kaba long ka Ri Kynti jong ka Hima, da kawei ka jingmut ka la rai skhem ban pynkut noh ïa ka kam bad jinglong Sordar u Bah Balajied Ïawbor ha Majai.
Ha katei ka shithi la ong ba kane ka Ri Majai ka dei Ri Bam Syiem ba la ju pynïaid hi da ki Syiem naduh hyndai, hynrei dei ha ka snem 1996 ba u Pa’iem Freeman Sing Syiem (ba la khlad noh) u la aiti mon sngewbha hakhmat ka Durbar Hima ban long noh ka Ri-Kynti jong ka Hima bad ïa kane ka jingsbun bad jingkylluid mynsiem jong u Syiem, ka Durbar Hima ka pynpaw ka jingsngewnguh ïa u Syiem bad la pynskhem ïa ka da ka Dulir jong ka Hima ïa kaba la khot ka White Paper.
U Acting Chief u la ong ba na ka bynta ban peit ban khmih ha kaba ïadei bad ka bha ka miat ka imlang sahlang, ka shong-suk shong-shngaiñ ha baroh ki kyntoit kiba kynthup ïa ka Lailad, ka Umdud, Dhorombasti, Nayabasti bad Chaklabasti lait noh ka Mawblei (Kurikhal) bad Umsawmaskon kiba la don la ki jong ki nongpeit nongkhmih bad la buh ïa u Bah Balajied ban peit ban khmih ïa kine ki kyntoit shipor da kaba pyntip barabor ïa baroh ki jingdonkam sha u Myntri In-charge ka shnat Majai uba long ruh u Acting Chief ka Hima.
Kane ka jingpynkut noh ka Hima ïa Bah Balajied Ïawbor kum u Sordar ka Majai ka pynlong ïa ki nongshong shnong ban ïa mih paidbah ban pynpaw ka jingbitar ha ka 08 tarik u Nailar 2026 ha ka jingïalang ba la khot pynlong ha madan shnong.
Ka Executive Committee jong ka Dorbar Shnong Majai-Bholaganj lem ki nongshong shnong kynthei bad shynrang ki la ïalum paidbah ban ïakren ïa kane ka kam bad mar ïa dep pule u Bah Daminot Sohtun, Secretary Shnong ïa ka shithi na u Acting Chief, baroh ki nongshong shnong ki la pynpaw da kaba ïa rah kti ba kim pdiang satia ban weng ïa u Bah Balajied Ïawbor na ka shuki Acting Sordar.
Ki nongshong shnong, ki dkhot Executive Committee ki la pynpaw ba kin pyrshah beit ïa katei ka shithi bad pynpaw jinglyngngoh ba kumno u Acting Chief u weng ïa u Acting Sordar haba u khlem leh pyrshah ïa ki kyndon ka Sanad ba la ai na ka ophis u Syiem bad khamtam ruh ba ïa u Bah Balajied Ïawbor la jied Sordar da ki nongshong shnong ka Majai-Bholaganj.
Haba kren sha ki nongthoh khubor hadien ka jingïalang, u Bah Daminot u la ong ba ka dei beit tang ka jingthmu ban ïuhroit bad ban plie lynti ïa ki briew kiba u Acting Chief u sngewieid sngewjan kiba ym dei ki trai ri ki trai muluk bad u la ong ba ïa kane ka rai yn sa phah sha ka Executive Committee ka KHADC ban leh ïa kaba donkam.
U Bah Challange Rajee, u ba dei ruh u Executive Member ka Dorbar Hima Sohra u la ong ba ka long kaba sngewlyngngoh halor ka jingpynmih ïa ka shithi weng Acting Sordar ïa u Bah Balajied bad namar ka jingsngew pyrshah u Bah Challange u la shim ïa ka rai ban ïehnoh ïa ka kam Executive Member ka Dorbar Hima Sohra.
