Shillong, Nailar 09
Ka Meghalaya Schools Welfare Development Association (MSWDA) ka kyrpad ïa ka Sorkar Jylla ban lum ïa ka jingïalang ha shuwa jong ka jingrakhe sngi burom ki nonghikai (Teachers’ Day) ban ïa pyrkhat haba ïadei ka bha ka miat jong ki nonghikai skul bad ban pynbha ïa ka pule puthi ki khynnah skul ha ka Jylla.
U Bah H.M. Marbaniang President MSWDA haba kren sha ki nongthoh khubor hadien ba wai ka jingïalang kaba la long ha Khasi National Dorbar Hall Shillong u la pynpaw ba ki mat ba ka kynhun ka la pynsngew ïa ka Sorkar ki long ka jingdawa jong ki Secondary bad Higher School kiba khlem pat ïoh ka jingïarap lane Grant-in-aid, ka jingeh ki nonghikai SSA Non-NOC School, ka jingpynbha bad ban pynkhlaiñ ïa ki skul khamtam ïa ka kyrdan Pre-Primary bad Lower Primary, ka jingbym ïoh syrnod jingpynshisha ki nonghikai ba la pyndep ïa Diploma in Elementary Education (D.El.Ed) napoh ka National Institute of Open Schooling (NIOS) bad kiwei de ki mat.
Shuh-shuh u la ïathuh ba ka MSWDA ka la phah ïa ka jingtyrwa sha ka Sorkar Pdeng haba ïadei ka skhim Pradhan Mantri Poshan Shakti Nirman (PM POSHAN), ka Uniform Grant jong ki khynnah bad ka Composite School Grant.
Haba ïadei ki nonghikai ki bym pat ïoh ka jingpyntbit, ka MSWDA ka la kyntu ïa ka Sorkar ba kan ïateh bad ka IGNOU lane bad kino-kino khnang ba kan long ka jingplie lad ïa ki nonghikai ba kin pyndep ïa ki jingshah pyntbit.
Haba kyrpad jur ïa ka Sorkar ba kan khot ïa kane ka jingïalang ban ïakren ïa ki jingeh ki nonghikai bad ki khynnah skul, u Bah Marbaniang u la pynpaw ba ka kynhun jong kiba baroh shi katta ka ai ka jingïatreilang bad kino-kino ki jingbthah jong ka Sorkar, kumta ka MSWDA ka dawa ïa ka Sorkar ban khot ïa kane ka jingïalang, da kaba pynpaw ba lada ka Sorkar ka kuman ka kynhun kam banse ban weng ïa ka jingïatreilang bad ka Sorkar nangne shakhmat.
