Shillong, Nailar 09
U MDC ka party Bharatiya Janata Party (BJP) Tura u Bernard N Marak ha ka sngi saitjain u la ong, ba ka jingkhihwin ha Garo Hills Autonomous District Council (GHADC) ha ka sngi Thohdieng, ka la mih hadien ba ka Iing dorbar ka la kyntait ban wanrah ïa ka Bill ba kongsan halor kaei kaba la buh ban long ka sngi ba khatduh jong ka dorbar.
“Ha ka jingshisha hynnin ka sngi, kaba dei ka sngi khatduh jong ka Dorbar GHADC, katkum ka agenda ka Dorbar kan kut ha ka 07 tarik Nailar, kumta ym shym la pyntip ïa ngi ban pynjlan ïa ka por,” la ong u Bernard.
U la ong ba ki MDC liang pyrshah, ki kwah ba ïa ka bill kaba pynkylla ïa ka Rule 128 bad 129 jong ka Autonomous District Council Rules, yn ïakren ha ka sngi Thohdieng hi, namar ba kadei kaba ïadei bad mano ba lah ban thep vote bad mano ba lah ban pynrung ha ka thup nongthep vote.
“Kumta namar ba kadei ka sngi ba khatduh, ngi la kwah ba ïa ka bill ban pynkylla ïa ka kyndon 128 bad 129 jong ka Autonomous District Council Rules, kaba wanrah ïa ka jingkylla, mano ba lah ban thep vote bad mano ba lah ban pynrung ha ka thup kyrteng nongthep vote,” u la ong.
U Bernard u la kynnoh ba ki don ki jingïapher hapdeng ka bill bad ki jingai jingmut jong kawei ka komiti ba la thaw da ka komiti treikam ba mynshuwa
“Ka la don ka komiti ba la thaw da ka komiti treikam ba mynshuwa bad ka komiti ka la ai ka jingmut ïa ki katto kattne ki jingkylla. Haba ngi la peit bniah ïa ki jingai jingmut jong ka komiti bad ka bill kan long kumjuh, ka la don ka jingkylla hangta,” u la bynrap.
U la bynrap ruh ba haba ki la kyrpad ïa u Chairman ban wanrah ïa ka, la ïathuh ba yn sa shim ha ka sngi Nyngkong.
“Kmuta ngi la kyrpad ïa u Chairman ban wanrah hynrei ki la ong ba kin wanrah ha ka sngi Nyngkong. Kumta nga la hap ban ïeng namar ba ym shym la ai jingpynbna ïa ngi shaphang ban pynjlan ïa ka Dorbar haduh ka sngi Nyngkong. Tang kawei ka jingpynbna bad ka agenda klaba ngi la ïoh ka long, ba ka Dorbar ka sdang ha ka 28 tarik u Naitung bad kan kut ha ka 07 tarik u Nailai,” la ong u Bernard.
Da kaba khot ïa ka kum ka “mat kaba khia bha”, u la ong ba katei ka jingïakhih, kadei ka jingkynthoh kaba beit-beit ïa ka jingkyntait.
“Kumta kane kadei ka mat kaba khia bha. Kumta ngi la hap ban pynmih ïa ka sur jong ngi, ngi la hap ban dawa ban wanrah ïa ka bill ban ïakren namar ban a ka bynta jong ngi, kadei ka tarik kaba khatduh hynrei ki la kyntait, kumta ka jingkulmar ka la sdang,” u la ong biang.
U Bernard u la buh jingkylli ruh ïa ka rai ban pynjlan ïa ka Dorbar, khlem da pyntip sha ki dkhot.
“Ngi sngew ba ka don ka jingleh thok, ki trei da kaba rieh bad balei khlem kano-kano ka jingpynbna ki pynjlan ïa ka dorbar. Mano ba wan ha ka sngi Nyngkong? Balei ba hap ban pynjlan haduh ka sngi Nyngkong? Kine kidei ki jingkylli kiba la pynartatien ha ka jingmut jingpyrkhat jong ngi,” u la ong.
U la kynnoh shuh shuh, ba ka jingpynthut ka mih na ka rukom pynïaid ïa ka Iing Dorbar.
“Ka jingkulmar kam dei kaba la thmu, kadei ka jingkynthoh ba la ai da ki MDC ka liang pyrshah pyrshah ïa ki MDC ba synshar, ka NPP ka TMC, kidei ki MDC ba synshar bad ngi ka BJP, ka Garo National Council bad ki Independent la buh kum ka liang pyrshah, watla kam don kano-kano ka kyndon ha ka riti synshar ka ri, ba lah ban don ka liang pyrshah ha District Council,” la bynrap u Bernard.
