Shillong, Nailar 10
Ka KC Lights Choir kaba dei ka kynhun rwai jong ka Kiddies Corner Secondary School, Shillong ka la wanrah burom ïa ka Jylla bad ka Ri baroh kawei, ba ka la lah ban jop artylli ki takma ksiar na ka jingïakop rwai ha ka “3rd Thailand International Choral” kaba la long ha Bangkok.
Ka 3rd Thailand International Choral Competition ka dei kaba la pynlong da ka Inter-national Choral Associa -tion kaba la sdang naduh ka 3 tarik haduh ka 7 tarik u Nailar 2026 bad ki 25 ngut ki khynnah rit kiba long ki nongrwai ba kynsai jong ka KC Lights Choir ki la wanpoi ha nongbah Shillong ha ka lah Sngi Blei ka 10 tarik Nailar 2026.
Ka Kiddies Corner Secondary School, ryngkat ka Hynñiewtrep Integrated Territorial Organisation (HITO), ka United Hynñiewtrep Movement (UHM) bad ka Caferacers Of Shillong Motorcycle Club ki la pynlong ka jingpdiang burom ïa ka kynhun rwai KC Lights ha Inter-State Bus Terminal (ISBIT) Mawiong, Shillong.
U Principal jong ka KC School u Bah Brian Wallang haba kren sha ki nongthoh khubor u la pynpaw ka jingsngewkmen kaba khraw haba ïadei ka jingjop jong ka kynhun bad pynpaw ha kane ka jingïakop ki don ki don haduh 9 tylli ki bynta ka jingïakop, ka KC Lights ka shimbynta ha ki ar bynta bad ka jop ruh ar tylli ki takma ksiar.
Shuh-shuh u la pynpaw ba ka KC Lights Choir ka la jop kyrpang ruh ha ka ‘Most Inspirational Choir Award’, u la ïathuh ruh ba ha ka sngi sdang jong ka jingïakop ka kynhun ka la rwai da ka jingrwai Khasi ba la ai kyrteng ‘Oi-oi’ katba artylli ki jingrwai ba la rwai ha ka jingïakop ki kynthup ka jingrwai ‘U Sier Lapalang’ bad ‘Ka Jingwanphai’ kaba dei ka jingrwai ba la thaw bad la pynbit pynbiang hi da ka Kiddies Corner Secondary School.
U la ïathuh ruh ba ka KC Lights Choir nangne shakhmat kan dang bteng ban leit sha kiwei ki jingïakop rwai, wat lada ka don hapdeng ka jingeh, namar kumba ka long mynta ka dang ïaksait hi dalade ban pynbiang haba ïadei ki jinglut jingsep ha ka leit ka wan bad kiwei ki jingdonkam.
