Shillong, Nailar 10
U President ka Meghalaya Pradesh Congress Committee (MPCC) Bah Vincent H Pala ha ka sngi Nyngkong u la kynnoh bad batai lypa ba ka Sorkar Meghalaya Demo -cratic Alliance (MDA) ba ïalam da ka National People’s Party kan sa kyrshan ïa ka jingthmu ban pynkylla ïa ka Foreign Contribution Regulation Act (FCRA) ha Parliament.
Haba kren sha ki nongthoh khubor, u Bah Pala u la ong ba ka jingïeng jong ka NPP hapoh ka Lok Sabha kan long shisha kaba kongsan bha.
“Ha Parliament, ha Rajya Sabha, ka NPP ka la don ïa u dkhot ka Parliament. Nga tharai ka histori kan ïathuh ïa kaei kaba kin sa leh ha Parliament, la kin kyrshan ïa ka FCRA ne kin pyrshah ïa ka,” la ong u Bah Pala.
“Nga sheptieng ïoh kin phet rieh. Kumta, la thikna ba ka MDA kan kyrshan ïa ka FCRA. Ka MDA ka dei lypa ka BJP, te shaei kin leit?” u la bynrap.
U Bah Pala u la kynnoh ruh ba ka Sorkar Pdeng ka la pyndonkam ïa kane ka Bill ban thombor ïa ki rit paid niam bad ki sengbhalang.
“Ka Sorkar da lei lei ruh kan nym lah ban pynduh jait ïa ki Khristan ha India. Ki la pyrshang ïa kata. Hynrei kane ka dei ka rukom kaba ki lah ban pyndik ïa ki”, u la ong.
“Ym tang ki Khristan hynrei wat kiwei pat ki jaidbynriew ne kiwei-kiwei ki seng trei mon sngewbha, ka dei ka rukom ban pyndik bad ka dei ka rukom ban lute ïa ki mar ki mata jong ki. Da kaba buh ïa ka bill ha kata ka rukom ba baroh yn pynïaid da ka bor Sorkar – kata hi ka long kaba khñiot bad lute,” la kynnoh u Bah Pala.
U la maham ba ki jingpynkylla ki lah ban don ka jingktah kaba beit-beit ïa ki jaka pule ha ka Jylla.
“Ïa ki skul jong phi, yn shim noh, ïa ki hospital yn shim noh, kumjuh ruh ki ïingmane kin shah shim noh”, u la ong.
Shuh shuh u Bah Pala u la kam ruh ba ka Sorkar ba la ïalam da ka BJP ha ka Ri ka dang sah sa tang khyndiat por.
“Kane ka Sorkar ka dang sah sa ar snem shiteng bad nga tharai ba kan sa don ka jingkylla thikna”, u la ong.
