Shillong, Nailar 10
Ka Joint Action Com-mittee (JAC), ba kynthup ïa ki longkmie na Laban kiba pyrshah jur ïa ka jingthmu shna Ropeway, ha ka lah sngi U Blei, ki la pynpaw ïa ka jingpyrshah hadien ba la dep ban pynlong ïa ka jingjurip myn ha ka 08 tarik u Nailar 2026, ban wanrah ïa ka jingshna ïa ka projek Ropeway ha katei ka thaiñ.
Kane ka jingpyrshah kine ki longkmie na Laban, ban shna ïa ka Ropeway, kadei halor ka jingpom pathar ïa ki dieng ki diej bad ka jingpynjot ïa ka mei mariang, bad kaba kongsan eh ka long ba ka la ktah ruh wat ïa ka umbam umdih ha kitei ki thaiñ.
Ki la kynnoh, ba ki katto-katne ngut ki Rangbah Shnong bad ki dkhot ka shnong ki la leit ban jurip ïa ka jaka ban shna ïa ka Ropeway ha Laban, myn ha ka sngi Saitjaiñ, hynrei kim shym la pyntip sha ki dkhot ka JAC ban wan lang ha katei ka sngi.
Kumta ki la ong, ba ki Rangbah Shnong ki la ïuhroid ïa ki khun ki hajar ka Riat Laban Dorbar Pyllun hi baroh kawei.
Haba kren sha ki lad pathai khubor ka Kong Alvareen Marweiñ ka la ong, ba shisien ba la ktah ïa ka mei mariang ka long ka jingduh kaba khraw na ka bynta ki pateng ban wan. Da kaba buh ruh ïa ki jingkylli halor ka jingpynkynriah ïa ki dieng ban thung sha West Khasi Hills, ba hato don ban hap leit shaduh WKH ban leit ring mynsiem bad leit wad ïa ka tyllong um bam um dih?.
Ki la buh jingkylli ruh, na kaei kadaw ba ki rangbah shnong kim shym la khot lang ban leit jurip ha ka sngi Saitjaiñ ka jaka ban shna Ropeway, lada kin khot lang ki la ïoh ban ïatai sani bha halor katei ka projek.
“Kaei kaei ka projek kaba la wanrah da ka Sorkar Jylla, ka long shisha kaba la pynduh ïa ka mei mariang, ha kaba tang ban ïoh jingmyntoi kita ki nongjngohkai pyrthei ban wanrah ka roi ka par, ka la long shisha ka jingduhnong kaba khraw ïa ka shnong jong ngi bad na ka bynta ka lawei ka pateng ban dang wan,” ka la bynrap.
Na ka liang ka Kong Debora Marbaniang, President ka JAC, ka la ong ba katkum ka jingpynbna lyngba ki rynsan khubor ba na ka liang ka tnad jngohkai, ka lah dep ban phah ïa ka Notice ne ka jingpynbna sha ki 7 tylli ki Dorbar ka Riat Laban Pyllun bad lyngba u Secretary, la ong ba la dep ban pynlong ïa ka jingpynsngewthuh paidbah ne ka Public Hearing ha u snem 2022, hynrei na ka liang ki nongshong shnong pat ki khlem ïoh ïa kano-kano ka jingpyntip halor kane.
“Kum ki kynthei mynta ngim lah shuh ban shu sngap jar. Mynta ka la dei ka por ïa ngi ba ngin mih ban ïeng pyrshah ïa ka jingshah, ban nym shah ñion beiñ ha ki dkhot ka Riat Laban Dorbar Pyllun. Lada dei ba kin don hi ka dohnud kaba beit, ngim donkam ban mih madan, kane ka jingleh jong ki wat ha ka jingleit jurip ha ka sngi Saitjaiñ ruh kim shym la pyntip ïa ngi ki dkhot ka JAC. Lada jia ba ngim mih ban pyrshah, ngim tharai ba kin leit ban jurip ïa katei ka jaka,” la ong ka Kong Debora.
Kumta ka la bynrap ruh ba kane mynta ka la pyni shai ba ki 7 tylli ki dorbar ka Riat Laban ki la shu ïuhroid bad leh donbor, khlem da kheiñ shuh ïa ki nongshong shnong.
