Shillong, Nailar 10
Ka ïingbishar Meghalaya High Court kala buh ïa ka suo motu PIL halor ka jingtih dewïong beaiñ ha Jylla ban shong bishar bniah ha ka 31 tarik Nailar, 2026.
Ka division bench u Justice H.S Thangkhiew bad W Diengdoh kala shong bishar ïa ka PIL ha ka sngi Nyngkong.
Ïa kane ka mukotduma ym shym la lah ban bishar kham hashuwa namar ka jingbym lait por ka bench.
Ka Jylla kala aiti ïa ka kaiphod halor ka Thirty-Eighth Interim Report jong u Justice BP Katakey (Retd) Committee ha ka 6 tarik Naitung bad ïa ka kaiphod ba bniah jong ka Thirty-Ninth Interim Report kaba 3 tarik Naitung, la aiti ha ka sngi Nyngkong ha ïingbishar.
U Advocate General A Kumar ula batai ïa ka ïingbishar halor ki jingpyntreikam ka Jylla ïa ki jingai jingmut jong ka committee.
U AG u la pan jingbit ban file shuh-shuh ïa ka kaiphod kaba bniah halor ka 39th Interim Report hashuwa ka sien shong bishar ban wan.
Ka ïingbishar kala ong ba ïa baroh artylli ki Interim Report yn sa klob lang bad ki kaiphod ka Jylla bad buh ïa kane ka kam ban shong bishar bniah hashuwa ban pynmih ïa ka hukum kaba dei.
Ka Katakey Committee kan ïai bteng ban peitngor ïa ka jingtih dewïong, jingshalan bad ki kam ba ïadei bad ka mariang kiba don jingïadei bad ka jingtih dewïong ha Meghalaya.
