Shillong, Nailar 10
Ka Meghalaya Pradesh Congress Committee (MPCC) ha ka sngi Nyngkong jong ka taïew ka la pynlong ïa ka jingïaid paidbah ne ka rally ban pyrshah halor ka jingthmu ka Sorkar India ban pynkylla ïa ka Foreign Contribution Regulation Act (FCRA).
Ïa kane ka jingïaid paidbah la ïalam da u Bah Vincent H Pala, President MPCC, ryngkat ki spah ngut ki nongkyrshan ka party, da kaba ïaid kjat na Madan Fire Brigade sha Don Bosco Square Laitumkhrah.
Ha kane ka jingïaid ki la dawa ban hiar shuki ïa u Myntri Rangbahduh ka ri, u Narendra Modi bad u Myntri ka tnad kam pohïing u Amit Shah halor ka jingthmu ban pynkylla ïa ka Foreign Contribution Regulation Act (FCRA).
Haba kren ha ka jingïalang, u Bah Pala u la kynthoh jur ïa ka BJP, ba ka la pyrshang ban ai jingmynjur da ka bor ïa ka Bill hapoh ka Parliament ha kane ka taïew.
Ka Laitumkhrah kadei ka jaka ba don bun tylli ki jaka pule ba la pynïaid da ki kynhun niam naduh ka St. Anthony’s bad ka St. Edmund’s, kiba shaniah ha ka jingbei tyngka jong ka FCRA.
“Ka BJP ka la pynmih ïa ka hukum (Whip). Ki lah ban wanrah ïa ka FCRA Bill mynta ka sngi, lashai, lane la shi sngi. Ka Parliament ka la buh ban ïakren ha ka 13 tarik u Nailar, hynrei kin pyrshang ban pynbor lyngba shuwa kata” u la ong.
U la batai ïa katei ka jingïakhih da kaba ïaid kjat kum ka jingpyrshah ïa ka jingshah thombor ki kynhun niam, ki seng trei mon sngewbha kiba ïoh jingïarap pisa na bar ri kaba nyngkong hadien ka jingïoh laitluid ka ri.
“Kane ka Rally kadei na ka bynta ki nongshong shnong, kam dei ka saiñ pyrthei, kine ki shlem ai jingshakri paidbah kim dei kiba pyrshah ïa ka Sorkar India, ki don hangne ban ïatreilang bad ka Sorkar” la ong u Bah Pala.
Da kaba ong ba ka jingpynkylla, kadei kaba ma tam ha ka histori jong ka ri India,” u Bah Pala u la kdew kyrpang ïa ka Clause 16(a).
“Lada phim lah ban pynthymmai ïa ka FCRA jong phi, lane lada phi aiti noh ïa ka, ka Sorkar ka lah ban shimti ïa ki jingdon jingem. Wat lada ka Balang ne ka skul ka ïoh tang khyndiat ka jingbei tyngka nabar ri, hynrei ïa ki jingdon jingem la shah ban knieh noh,” u la bynrap.
U Bah Pala u la ong, ba ka Congress kam pyrshah ïa ka jingpynjari ïa ka aiñ, hynrei ïa ka jingpynshitom kaba kyllum lang baroh.
“Ngim don jingeh eiei ïa ka FCRA katba dang pyndonkam ïa ka ha ka jingthmu kaba dei. Ngi pdiang sngewbha ïa ka jinglong khuid bad ka jingdon ka jingkitkhlieh. Hynrei pynshitom ïa kito kiba pyndonkam bakla ïa ka pisa, ym ïa baroh”, u la ong.
U la maham ba ki jingkylla kin ktah jur ïa ka Jylla Meghalaya.
“Peit ïa ka St. Anthony’s, St. Edmund’s bad bun kiwei kiwei ki skul ha kylleng ka Jylla, kiba shaniah ha ka FCRA. Lada ym pynthymmai ïa ki laisen bad kine ki jaka pule kin khang noh, ki khynnah jong ngi kin mad jingeh,” u la ong.
“Lyngba ka FCRA ngim ïoh ïa ki jingtei, ngi ïoh ïa ka jingpule, ki hospital, bad ka jingkyrshan ïa kiba duk. Lada pynduh noh ïa kita ki lad jingïarap bad ka jingkyrduh kam bad ka jingeh kan nang kiew.” U la ong biang.
“Kane kam dei shaphang ka jingmyntoi jong ka Party”, u la bynrap.
“Ka Congress ka ïakhun na ka bynta ka lawei jong ki khun ki kti jong ngi” ong u Bah Pala, da kaba khot ruh ïa ka jingïatylli.
“Ka India kan khlaiñ tang ynda baroh ki nong India -ki rit paid, ki balang, ki seng trei mon sngewbha kin ïatreilang. Ka jingthombor ïa ki rit paid, ki Khristan, ki Hindu, ki Sikh, kan nym ïarap ïa ka India,” u la ong.
Ki nongïakhih ki la pynmih ïa ki jingpyrta “BJP down down”, “Hiar shuki Modi”, “Hiar Shuki Amit Shah” bad “Ngi dawa ïa ka hok”.
