Shillong, Nailar 10
U Myntri Rangbah ka Jylla, u Conrad K, Sangma ha ka Lah Sngi U Blei u la ïakynduh ïa ka Myntri tnad pla tyngka ka Sorkar Pdeng, ka Nirmala Sitharaman bad u Myntri Khynnah ka tnad Ayush, u Prataprao Jadhav ha New Delhi ban ïakren halor ka jingmang pisa bad ki lad jingïarap ha ka liang ka koit ka khiah na ka bynta ka Jylla.
Ha ka jingthoh ha ‘X’, u Conrad u la ong ba ka jingïakynduh bad ka Sitharaman ka long kaba manbha bad kaba tei.
U la pynpaw ïa 2 tylli ki mat ba kongsan: ka jingbuh kyndon ïa ki Externally Aided Project (EAP) na ka bynta ki Jylla ka Thaiñ Shatei Lam Mihngi, bad ka jingailad ïa ki Jylla ban bat ïa ki ‘Exchange-rate Gain’ na ki EAP kiba dang ïaid shakhmat.
“Nga sngewnguh ïa ka jingshah skhor jong ka, ka jingkdew lynti, bad ka jingkyrshan ba ïai bteng jong ka ïa ka Meghalaya bad ka Thaiñ Shatei Lam Mihngi,” u la thoh.
Hadien kane, u Myntri Rangbah u la ïakynduh ïa u Prataprao Jadhav ban ïakren halor ka jingpynheh ïa ka North Eastern Institute of Ayurveda and Homeopathy (NEIAH) ha nongbah Shillong.
U la ong ba ka jingpynheh ïa ka NEIAH kan ïarap ban pynlong ïa ka Meghalaya kum ka jaka pdeng jong ka thaiñ na ka bynta ka jingpule, ka jingwad bniah bad ka koit ka khiah ha ka liang ka ‘Ayush’, bad kyntu ïa u Myntri ban “pynsted haba ïadei bad kane ka kam.”
