Nongpoh, Nailar 10
Ki pulit ka Ri-Bhoi District ki la pan jingïarap na ki paidbah ban lapdien ïa uwei u heprit ba dang 16 snem ka rta na ka shnong Mawkyrdep jong ka thaiñ Umroi ha Ri-Bhoi District uba la jah rngai na la ïing naduh ka 1 tarik u bnai Nailar, 2026.
Katkum ka kyrwoh ba la pyllait da u Giri Prasad, Superintendent of Police ka Ri Bhoi District, la pyntip ba ka kmie jong utei u heprit, ka Kong Matisha Ramshon kala ujor ejahar ïa katei ka jingjia ha ka 1 tarik mynta u bnai da kaba ong ba utei u khun jong ka u la mih na la ïing da ka jingthmu ban leit bad uwei u nongïalam niam.
Haba ki bahaïing hasem ki pyrshang ban wad ïa utei u heprit, ki la shem ïa kawei ka pla kieng jong u ha Retreat Centre kaba don ha Umroi Nongrah.
La ïathuh ruh ba ha ka step kaba bud, utei u heprit u la phone ïa la ka kmie da u number phone 6009666700 da kaba kam ba u don ha Shillong bad pan ïa ka Aadhaar card jong u. Hynrei hadien ba ki bahaïing kila pyrshang ban phone biang, la shem pynban ba u trai jong utei u number phone u dei uba don ha kad liengsuiñ ka nongbah Guwahati bad thmu ban leit kiew sha liengsuiñ. Ka kmie kala ïathuh ruh ba utei u khun jong ka u don lang ha katei ka jaka shwa ba kut ka jingïakren phone.
Halor kane ka jingjia, ki pulit ki la register case ha thanad Umiam katkum ka Case No. 52(08) 2026 hapoh ka kyndon 137(2) jong ka aiñ Bharatiya Nyaya Sanhita (BNS) bad ka jingtohkit ka dang ïaid shakhmat.
Ki pulit ki la pyntip ruh ba utei u heprit ba dang 16 snem ka rta u dei uba jrong kumba 5.6 phut, uba shai ka sniehdoh bad met pdeng bad ha ka por shwa ba un jah rngai, u la phong ïa ka patlun rong ïong, ka t-shirt rong ïong bad ki sandal.
Halor kane ka jingjia, ki pulit kila kyntu ïa kino-kino ki paidbah kiba don jingtip shaei ba utei u heprit u don, ba kin pyntip sha ka Police Control Room Nongpoh ha u number 6909300160 lane sha Umroi Police Information Centre (PIC) ha u number 6909300151.
