Shillong, Nailar 10
U Samla Kwis Sumer, uba dei na ka shnong Muktapur, East Jaiñtia Hills, uba la jah rngai la jan dap 1 bnai ha Karnataka, la lap noh da ki pulit ha kaba la wan ïalam noh sha Shillong ha ka 10 tarik u Nailar 2026.
La lap noh ïa une u Samla hadien ka jingwad ba khlem sangeh bad ka jingtrei shitom ki pulit ka Meghalaya bad ki pulit ka Karnataka bad kiwei-kiwei de ki kynhun.
U Samla Kwis Sumer u dei uba la don ha ka rta 23 snem.
Ïa une u Samla la leit shaw da ki bahaïing hynnin ka sngi U Blei bad mynta u la wan poi ha Shillong hadien ba la lap ïa u ha kawei ka jaka ba kham kynjah, ha Karnataka.
U Myntri Rangbah ka Jylla u la shimkhia mardor bad ban ïakren bad ka Sorkar Karnataka, kaba ki la pynsted ban ïatreilang hapdeng ki ar jylla, ban wad haduh ban da lap ïa u Samla Kwis.
U Rev. HCT Sumer, President ka Kur Sumer pyllun Khasi Jaiñtia u la ïathuh ba ïa une u samla, ki don kiba khot ïa u ban ai kam bad u leit sha Karnataka na ka bynta kata, hynrei ym pat lah ban tip ka kam aiu kaba u la shah tyrwa, namar ba kane ka kam ka dang don ha ka jingtohkit ki pulit. Bad kumjuh ruh ïa kadaw ka jingjah jong u ym pat lah ban tip. Ka jinglap ïa u, kadei na ka jingtrei shitom ki pulit ka Jylla bad ki pulit Karnataka, kaba u Myntri Rangbah ka Jylla, u Conrad Sangma u la phah ïa ka kynhun pulit na ka Jylla ban leit sha Karnataka na ka bynta ban wad ïa u ne u Samla.
Kumta u la ai ka jingïaroh bad khublei ïa u Myntri Rangbah ka Jylla bad ki pulit bad kiwei-kiwei de ki kynhun, kiba la shimkhia mardor ban wad haduh ban da lap ïa u Samla Kwis Sumer.
U Dr. DRL Nonglait u la leit ban ïakynduh ïa une u Samla hadien ba u la wan poi ha Shillong bad u la ïathuh ba u Myntri Rangbah u la pynbiang ïa ka jingleit jingwan jong ki rangbah kur Sumer, ba kin leit lang sha Bangalore ban wad jingtip lang ïa une u Samla.
Une u Samla u la jah naduh ka 13 tarik u Naitung bad la lap ïa u ha ka 8 tarik u Nailar.
Ha katei ka sngi ba u jah la ïoh jingtip ba u Samla Kwis u la leit ban tied ïing ha ïing ki briew ha Tiptur District bad haba la mih ki trai ïing u la phet kulmar bad naduh katei ka sngi u la jah, ha kaba la ïoh ban tam ïa ka mobile phone jong u bad ïa ka tiket rel.
