Mairang, Nailar 10
Ha ka nohphai sngi jong ka Sngi Nyngkong ka taïew, ar tylli ki kali ki la julor hadien ba ki la ïa tyngkhuh lane tynrah ha surokbah Mairang – Shillong, ha kawei na ki jaka hajan ka shnong Lumsohkhlur Mairang, Eastern West Khasi Hills District.
Katkum ka tyllong khubor, ki ar tylli ki kali kiba la ïatyngkhuh ki kynthup ïa ka kali A-star kaba don ïa u registration number ML04-A-9273 katba ka dang mut kiew sha ki thaiñ Shillong hynrei kala ïa tyngkhuh bad ka kali Alto K10 kaba don ïa u registration number ML10-D-5310 kaba dang wan na ki thaiñ Shillong.
Shuh shuh la ong ruh ba kane ka jingjia ka la jia ha ka por kumba 1 baje duna eiei ha kaba katei ka kali Alto K10 kaba dang wan na ki thaiñ Shillong, ha kaba la ong ruh ba ka lah ban dei na ka jingpynher sted bad ka jingbym lah tehlakam kumta kala ïa tynrah bad katei ka kali A-star kaba kiew sha Shillong ban leit sha ki thaiñ Ri-Bhoi.
Ka khubor ka ong ruh ba ha katei ka jingjia u nongñiah jong ka Alto K10 bad uwei u nongshong kali, kila mynsaw jur ha kaba na ka liang ki paidbah kiba lap ïa kane ka jingjia, ki la phone mar-mar ïa ka Ambulance bad la pynkit noh sha Civil Hospital Mairang ban pynïoh ïa ka jingsumar, katba uba ñiah ïa ka kali A-star u la lait na ka jingmynsaw.
Shuh shuh la ong ruh ba ki pulit ki dang pynlong ka jingtohkit bniah halor katei ka jingjia ïatynrah kali.
