Jowai, Nailar 10
Ka Seiñraij Ialong ha ka 10 tarik Nailar ka la pynkut noh ïa ka lehniam ‘Behdeiñ -khlam’ hapdeng ka jingiphuh iphieng ryngkat ka jingwan sakhilang u Sym-bud Myntri Rangbah ka Jylla Bah Sniawbhalang Dhar bad Myntri ka tnad ka koit ka khiah bad MLA ka Jowai Bah Wailadmiki Shylla.
Ka lehniam Behdeiñkhlam jong ka Seiñraij Ialong ka sdang naduh ka 8 tarik Nailar da ki jinglehniam bapher-bapher ba la pyndep da u Langdoh ryngkat ki wasan, ki Maji bad u Sangot.
Ka Behdeiñkhlam Ialong la shim bynta da ki lai shnong, ka Wahiajer, Nongkhyllep bad ka shnong Ialong.
Ki jinglehniam ki kynthup naduh ka Khrong ka Khri, ka Choh Thyndai bad ka Kñia Khlam ban beh ïa ka khlam ka ngoh na ki shnong ki thaw bad ban duwai phirat ïa u nongbuh nongthaw ban kyrkhu kyrdoh ban bha ka rep ka riang.
Ha ka sngi pynkut, ki khun ka Seiñraij Ialong na kylleng ki dong bapher-bapher kila pynpoi haduh 13 tylli ki rot ha madan Aitnar Tre Pyrda.
U Bah Sniawbhalang Dhar ha ka jingkren u la ai khublei Behdeiñkhlam bad kitbok kitrwiang ïa baroh ki khun ka Seiñraij Ialong ba kin nangkiew ha ka roi ka par ryngkat ka jingieid ïa ka niam ka rukom.
U la pynpaw ruh ka jingkmen ban ïohi ïa ka jingkiew jong ka shnong Ialong ha ka liang ka roi ka par khamtam ka jingkylla ha ki lynti syngkien naduh shwa ban rung ha Ialong haduh ban da poi ha Tre Pyrda kaba la pynsuk shibun ïa ka leit ka wan jong ki paidbah.
Haba kren halor ka jingkiew jong ka shnong Ialong ha ka roi ka par, u MLA ka thaiñ Bah Wailadmiki Shylla u la ong, kane shnong ka kham pher na kiwei, ka dei ka shnong kaba ieid ïa ka roi ka par.
U la pynkynmaw ruh ïa ka kamram jong ki trai shnong ban sumar sukher, pynmiat pynbha bad pynkhuid pynsuba ïa kane ka jaka khamtam ïa ka mei mariang khnang ban ïoh ïa ka koit ka khiah.
Nalor u Symbud Myntri Rangbah, la donlang ruh ki MDC ka JHADC kynthup u Dy CEM Ma Lasky Rymbai, u EM Ma Moonlight Pariat bad Ma Reformingson Lamare, nalor u Superintendent of Police Jagpal Singh Dhanoa, ki Doloi na ki Elaka bapher, ki ophisar Sorkar nalor ki hajar ngut ki paidbah.
