Shillong, Nailar 10
Ka Khasi Students’ Union (KSU), Shillong Mihngi Circle, ka la ai por shi taïew ïa ka tnad pynroi sor ban pynpra noh ïa kawei ka jingtei kaba khlem ïoh jingbit kaba don ha phyllaw ka ophis treikam ka CBI ha Mawdiangdiang.
Ka seng ka la ong ruh ba kan ïaid shakhmat bad ka jingïakhih lada ym leh eiei halor kane.
U General Secretary ka seng, samla Samuel Kharbani u la ïathuh ba ka kynhun ka KSU ka la ïakynduh ïa u Director ka tnad pynroi sor ha ka Lah Sngi U Blei hadien ba ki la ïoh ïa ka jingpyntikna ba la ai jingbit tang na ka bynta ban shna ïa ka ophis bad ka jaka sah.
“Katkum ka jubab, kam shym la don kano-kano ka jingmynjur ban tei ïa ka ‘Temple’. Ngi la kyrpad ïa u Director ban pynpra ïa ka jingtei ba la tei be-aiñ bad ban pyntikna ba kan ym don shuh ka jingkynriah na ka ‘plan’ ba la mynjur,” la ong u samla Samuel.
Katkum ka jingong jong ka KSU, u Director u la pan por ban khmih bniah ïa ki mat haba ïadei bad kane ka kam.
“U Director u la pan por ban khmih bniah ïa ka dorkhast jong ngi, khamtam ïa ki mat kiba ïadei bad ki kam pynroi sor. Namarba ïa ka jaka la ai da kata ka tnad, ngi pynbor ïa ka tnad pynroi sor ban leh eiei,” la ong u samla Samuel.
Ka seng ka la ong ruh ba kam shym la leit mih sha ka CBI namarba ki heh ophisar kim shym la leh eiei ha ka jingleit ïakynduh kaba hashuwa.
Da ka jingpan por jong u Director, ka KSU ruh ka la buh por haba ïadei bad kane ka bynta.
“Ngi ai por shi taïew. Lada ym don ba leh eiei hapoh kane ka por, ngin pynlong ïa ka jingïakhih la ka long ha ophis jong u Director ne ha ophis jong ka CBI,” ong u samla Samuel.
Ha kajuh ka por, u la buh jingkylli halor ka jinglah ban shaniah ïa ka tnad treikam haba ïadei bad katei ka jingtei.
“Ka jingkylli jong ngi ïa ka CBI ka long kaei ka nongrim kaba ka pyrshang ban pyni sha ka Jylla haba ma ka hi ka ïaid shakhmat bad ka jingtei be-aiñ hapoh ka phyllaw jong ka,” u la ong.
Ka KSU ka la ong ba kan ap shuwa ïa ka jubab na ka tnad hashuwa ban shim ïa kino-kino ki sienjam nangne shakhmat.
