Shillong, Nailar 10
Ka kynhun ki kontraktor JJM, kiba hap ha ka shatri jong ka Khasi Jaiñtia Government Contractor and Supplier Association, ha ka sngi nyngkong jong ka taïew, ki la ïoh ban ïakynduh bad u Chief Executive Engineer jong ka tnad PHE ka Sorkar Jylla, halor ka jingsahkut ka bainong jong ki, kaba la ïaid mynta lai snem saw snem.
Kane ka bainong ka la sahkut la slem bha, wat haba ki kontraktor ki la pyndep ïa ka kam ruh. Haba kren sha ki lad pathai khubor, u Vice President ka kynhun kata u Bah JTS Thongni u la ong, ba hadien ba ki la ïoh ban ïakren bad u Myntri ka Sorkar Jylla, uba dei khmih ïa ka tnad PHE, u la pyntip ba la ïoh ïa ka jingmang ne ka sanction jong ka scheme JJM, kaba kot sha ka T.336 klur tyngka.
“Ngi sngew don jingkyrmen bha, namar la dep ban pyllait ïa kata ka pisa ba kot T.336 klur, ba kan ai jingmyntoi noh ïa ngi ki kontraktor,” u la ong.
Hynrei u la ong, ynda la ïakynduh ïa u Chief Executive Engineer, ka long man da khongpong, namar ha ka jingïakren bad u, u la shu kren kyllaiñ sha bneng sha khyndew, haba na ka liang jong ki, kim lah ban sngewthuh.
Namarkata, u la kynthoh jur da kaba ong “Imat kata ka bill kaba la dep mang ka dang don sha khlaw, kumta ka la pynartatien ïa ka Synjuk bad baroh ki kontraktor bad ka la pynduh ruh ka jingshaniah wat ïa kane ka Sorkar ba mynta. U Bah JTS Thongni u la ïathuh ruh ba na ka liang u CEE um shym la batai shai ne pynthikna ba ka pisa kin ïoh ha u bnai aiu sha ki kontraktor kiba la dep ban pyndep ka kam naduh ki 4 snem ba la dep.
“Ngi la shem jingeh shibun, ngi la trei hok ïa ka kam kumba la dep mang pisa, hynrei haduh mynta pat na ka liang ka Sorkar ka khlem lah ban siew ïa ka bainong bad ka hok kaba ngi dei ban ïoh,” u la bynrap.
