Shillong, Nailar 10
U Nongïalam ka Cong-ress u Bah Vincent H Pala ha ka sngi Nyngkong u la ong, ba ka seng ka la pynjur ïa ka jingpynkhreh na ka bynta ka ilekshon shi-teng samoi jong ka MP Lok Sabha kaban wan ha Shillong Parliamentary Konstitwensi bad u la kynnoh ba kiba phet seng bad ki nongïalam kiba la shah thied, kidei ki daw bah jong ka jingtlot jong ka seng.
U Bah Vincent Pala u la ong, ba ka rukom pynkhreh bad pynbit pynbiang na ka bynta ka ilekshon, kadei kaba lah jan dep artad.
“Ngi lah dep ban pynbit pynbiang ïa ka seng ha ka District bad Block Level. Mynta ngi dang ïaid shakhmat na ka bynta ban pynbiang sa ha ka Booth Level. Na ka liang ka jong ngi, nga lah ïaid pura bad baroh ki jingpynkhreh” ong u Bah Pala.
Ha kaba ïadei bad ka thup kyrteng ki nongthep vote ne Electoral Roll, u la pynpaw ba ka seng ka la khmih bniah bha ïa ka Special Summary Revision.
“Ngi la ïoh ïa ki jingtip na ka ophis treikam jong u DC bad na ka Block ruh kumjuh. Nga tharai shen yn sa pyndep pura noh ïa ka SIR hapoh jong ka 7 tarik u Risaw yn sa pyndep pura noh” u la ong.
Haba phai sha ka rukom treikam jong ka seng, u Bah Pala u la ong, ba ka Congress kam shym la rem na ki nongthep vote, hynrei kadei namar ka jingshah shet kylla na kiba napoh.
“Ka jingtlot jong ka Congress kam dei na ki nongthep vote, hynrei kadei namar ki nongïalam kiba la shah thied noh. Ki briew ki hap ban sngewthuh ba lada ka Congress ka tlot, ka imlang sahlang ruh kan mad ïa ka jingeh” u la ong.
U la kyntu ïa ki nongthep vote, ba kin khmih bniah bha ïa kum kitei ki jingphet seng hashuwa ban wan ka ilekshon shiteng samoi.
“Kumta, ki briew ki donkam ban pyrkhat shaphang kitei ki jingphet seng bad kito kiba la shah thied noh, mano ba thied ïa ki, ka pisa ka jongno. Ki paidbah kidei ban pyrkhat bha halor kane” la bynrap u Bah Pala.
Wat hapdeng ka jingtynjuh, u nongïalam ka seng Congress u la pynpaw ïa ka jingkyrmen ba ka seng kan sa khie im biang.
“Haba nga leit kylleng-kylleng, nga ïohi ïa ki briew ba ki dang ieid ïa ka Congress, hynrei ki la shah ïalam bakla ha ki katto-katne ki riewshimet. Ngi la shah pynrem tang katto-katne por, hynrei phin sa ïohi pat ba ka seng Congress kan sa kiew biang” ong u Bah Pala.
“Nga dang shu wan na Delhi bad nga lah ban ïohi ba kan sa kiew biang bad nga kyrmen skhem ba ngin sa poi biang sha kajuh ka kyrdan, kaba ka seng Congress ka ju don mynshuwa. Ngi lah ban synshar bha bad ha ka lynti kaba biang bha ïa ki paidbah,” la ong u Bah Pala.
