Shillong, Nailar 10
Wat hadien shi taïew jong ka jingshah kawang petrol bom jong ka ophis Meghalaya State Pollu-tion Control Board (MSPCB), ki pulit haduh mynta kim pat lap dien ne lap ksai ïa kiba donkti ha kane ka kam.
U SP (City) Bah Dangsan Khyriem ha ka sngi Nyngkong u la ong ba ka jingtohkit ka dang ïaid shakhmat. “Haduh mynta ym pat ïoh kem ïa ki briew kiba donkti. Ka jingtohkit ka dang ïaid shakhmat,” u la ong.
Kane ka jingjia ka la jia ha ka por kumba 12:10 mynsngi ha ka 3 tarik mynta u bnai, ha kaba arngut ki briew kiba la kah durkhmat ki la poi da ki ar tylli ki scooty, ki la rung shapoh ka phyllaw jong ka MSPCB bad kawang petrol bom. Uwei u bom u la leit ban dei ïa ka bynta ba shabar jong ka kynroh, kaba la pynsniewdur ïa ka kynroh. Ha kane ka jingjia, ym shym la don kano-kano ka jingmynsaw.
Mar ïa ïoh jingtip, ki pulit ki la leit sha katei ka jaka. La khot ïa ka Crime Scene Unit sha katei ka jaka ban lum ïa ki sakhi sabut.
Halor kane ka jingjia, la dep ban ujor FIR ha thanad Laitumkhrah lyngba ka Case No. 121(08)2026 katkum ki kyndon 324(3)(6)/326(g)/3(5) jong ka BNS.
Ha kawei pat ka liang, la pynkhlaiñ ïa ka jingpahara ha phyllaw jong ka MSPCB.
