Shillong, Nailar 11
Ka Hynñiewtrep Integrated Territorial Organisation (HITO), Borders Area, Dawki Circle hapoh ka jingïalam u President, Bah Wanbor Lamin ha ryngkat bad ki ophisar na ka Infiltration Department, Jowai, bad u Labour Inspector, Jowai, ki la leit ban pynlong ïa ka jingïakynduh bad wad jingtip halor ki kot ki sla jong kawei ka kompeni kaba don ha Dawki, West Jaiñtia Hills, kata ka ASC Infratech Pvt. Ltd.
Ha kane ka sngi ki la pynlong ka jingpeit bniah ïa ki Trading Licence bad Labour Licence, ryngkat bad kiwei ki kot kiba don jingïadei bad ka jingtrei jong ka kompeni.
Na ka liang ka seng, ka la lap ba ki Trading Licence jong katei ka kompeni ki long kiba biang, hynrei, haba ïadei bad ka Labour Licence bad Police Verification, la lap ba ki don ki jingduna kiba dang hap ban pynbeit bad pynbiang.
Namarkata, ka HITO bad ki ophisar kiba don bynta, ki la ai por ar sngi ïa katei ka kompeni, ban pynbiang ïa ki kot kiba dang duna bad ban pynbeit ïa ki jingduna kiba la lap.
Lada ka kompeni kam lah ban pynbiang ïa kine hapoh ka por ba la buh, ka HITO kam banse, ban shim ïa kiwei pat ki sienjam kiba long katkum ka aiñ, ban ïada ïa ka hok jong ki nongshong shnong bad ban pynthikna ba baroh ki kompeni, kiba trei hapoh ka thaiñ ki bud ryntih ïa ki kyndon bad ki aiñ kiba treikam.
