Mawkyrwat, Nailar 11
U MLA ka Mawkyrwat, Bah Renikton L Tongkhar ha ka 11 tarik u Nailar, 2026 u la buh mawnongrim ïa ki ar tylli ki projek ha ka jingïalang ha phyllaw jong ka Dorbar Hall Jakrem, kata, na ka bynta ka skhim Jakrem A&B Water Supply Scheme kaba la mang tyngka haduh T.15 klur bad kawei surok shnong ban pynïasoh ïa kawei ka dong ba khot ka Mawbasa kaba la mang kumba T.1.40 klur bad ïa kine baroh ar tylli ki skhim la mang pisa lyngba ka State Scheme.
U Bah Renikton Lyngdoh haba ai jingkren u la ong ba kane ka dei ka sngi sah jingkynmaw na ka bynta ka shnong Jakrem ha kaba la ïoh ban buh mawnongrim ïa kine ki ar tylli ki skhim kiba yn sa ïoh ban pyntrei noh shen namar ba ïa ka mang tyngka ruh la dep ïoh.
U la ïathuh ruh ba ki skhim um ki la wan ha kane ka shnong naduh ka por u Bah Rowel kum u MLA bad kumjuh ka skhim JJM hynrei namar ka shnong Jakrem ka dei ka shnong kaba la heh bad ka jingmih jong ki longïing thymmai, ki tyllong um kim shym la lah shuh ban pyndap um ïa baroh ki longïing.
Hynrei u la pynpaw ïa ka jingkmen ba mynta la ïoh ban tan um na ka wah Rilang bad u kyrmen skhem ba kane skhim Jakrem A&B Water Supply Scheme kan long kaba jop.
U Bah Renikton u la pynpaw ruh ka jingkmen halor ka jingïoh ïa ka surok sha Mawbasa bad u la ïathuh ruh ba ka Mawkyrwat Constituency tang u bnai Lber ka la ïoh haduh kumba 14 tylli ki surok kumjuh ruh ki skhim um kiba kynthup ïa ka Nongsynrieh bad Rangblang Water Supply Scheme bad kiwei-kiwei.
Kumta na ka liang u Bah Renikton u la ai khublei kyrpang ïa kane ka Sorkar kaba la sngap ïa ka jingud jingnam ki paidbah ka dong ka thaiñ na ka bynta ban wanrah ïa ka roi ka par. Ha kajuh ka por u kyrpad ïa ki kontraktor ki ban sa pyntrei ïa kane ka skhim ba kin trei bha bad shim lem ïa ka jingkitkhlieh khnang ba ka skhim kan ym sahkut noh tang na ka daw jongno re jongno.
Kiwei pat kiba la ai jingkren ki kynthup ïa ka Deputy Commissioner Kong AL Mawlong, u Chief Engineer ka tnad PHE Bah RS Nongbri, u Executive Engineer ka tnad PWD Mawkyrwat Division, bad Bah Joel P Marbaniang.
